«QazTransOıl» AQ munaı tasymaldaý kólemin qańtar-qarashada 3 paıyzǵa arttyrdy
ASTANA. 12 jeltoqsan. QazAqparat - «QazTransOıl» AQ-nyń magıstraldy munaı qubyrlary júıesimen 2011 jylǵy qańtar-qarashadaǵy munaı tasymaldaý kólemi is júzindegi derekter boıynsha 49 mln. 334 myń tonnany qurady.
Ótken jyldyń sáıkes kezeńimen salystyrǵanda munaı tasymaldaý kólemi 1 mln. 455 myń tonnaǵa nemese 3 paıyzǵa artty, dep habarlady kompanııanyń baspasóz qyzmetinen.
«QazTransOıl» AQ MQ júıesi boıynsha júk aınalymy 2011 jylǵy 11 aıda 31 mlrd. 641 mln. tonna km. boldy. Byltyrǵy jylǵy osy kezeńimen salystyrǵanda bul kórsetkish 439 mln. tonna km-ge nemese 1 paıyzǵa artty.
Bıylǵy ótken 11 aıdyń qorytyndylary boıynsha «Ózen - Atyraý - Samara» magıstraldy munaı qubyrynyń «Atyraý - Samara» ýchaskesimen munaı aıdaý kólemi artyp, 14 mln. 126 myń tonna boldy. 2010 jyldyń osyndaı kezeńimen salystyrǵanda munaı tasymaldaý kólemi 105 myń tonnaǵa nemese 1 paıyzǵa kóbeıdi.
Kómirsýtek shıkizatyn tasymaldaý kóleminiń ósimi QHR baǵytynda da saqtalyp otyr. Aǵymdaǵy jylǵy qańtar-qarashada «Atasý - Alashańqaı» munaı qubyryna munaıdy aýystyryp quıý kólemi 10 mln. 091 myń tonna munaı deńgeıine jetip, ótken jyldyń osy kezeńimen salystyrǵanda 850 myń tonnaǵa nemese 9 paıyzǵa ósti.
Qazaqstan Respýblıkasy aýmaǵynda ornalasqan «TON-2» munaı qubyry bóligimen Reseı munaıynyń tranzıti 2011 jylǵy esepti kezeńniń qorytyndylyry boıynsha 4 mln. 978 myń tonnany qurady.
«QazTransOıl» AQ magıstraldy munaı qubyrlary júıesimen Qazaqstan Respýblıkasynyń munaı óńdeý zaýyttaryna munaı tasymaldaý kólemi 11 mln. 879 myń tonnany qurady. Bul rette AMÓZ-ge jáne PKOP-qa jetkizý tıisinshe 3 mln. 855 myń tonnaǵa jáne 3 mln. 947 myń tonnaǵa artty. Bul 2010 jylǵydan tıisinshe 12 jáne 8 paıyz kóp.
