«QazTransOıl» AQ Bas dırektory Dımash Dosanov stýdent-praktıkanttarmen óndiriste kezdesti
QARAǴANDY. QazAqparat - Qaraǵandy munaı qubyry basqarmasynyń óndiris nysandaryna jasaǵan jumys sapary barysynda «QazTransOıl» AQ Bas dırektory Dımash Dosanov, munaı qubyry basqarmasynda aqysy tólenetin óndiristik tájirıbeden ótip jatqan stýdenttermen kezdesti, dep habarlaıdy QazAqparat.
Qaraǵandy memlekettik tehnıkalyq ýnıversıteti, Q. Satpaev atyndaǵy Qazaq ulttyq tehnıkalyq ýnıversıteti, Qaraǵandy joǵarǵy polıtehnıkalyq kolledjden kelgen tehnıkalyq salanyń bolashaq mamandarymen kezdesýde Dımash Dosanov tehnologııalyq tseh jáne qyzmet kórsetetin óndiris bazasyn aralap, jastardy qyzyqtyrǵan suraqtarǵa jaýap berdi.
«Men Sizdermen ıaǵnı bolashaq kásibı mamandarmen kezdeskenime óte qýanyshtymyn», - dep atap ótti Dımash Dosanov.
«Munaı qubyry boıynsha tasymal búgingi kúni munaı gaz salasyndaǵy eń zamanaýı qondyrǵylarmen jabdyqtalǵan, avtomattandyrylǵan joǵary tehnologııalyq sektor bolyp tabylady. Sondyqtan biz úshin kásibı biliktiligi joǵary mamandar asa qajet. Qazirgi tańda kompanııanyń 10 aımaǵynda ornalasqan barlyq nysanynda 200-den astam stýdent óndiristik tájirıbıeden ótip jatyr. 45 stýdent óndiristik tájirıbıesin aıaqtap, shákirtaqylaryn aldy. Óndiristik tájirıbıe boıynsha úzdik nátıje kórsetken stýdentter, kompanııadaǵy bos oryndarǵa jumysqa turýǵa múmkindik alady. Osy oraıda, biz bos oryndar rezervin daıyndaıtyn bolamyz»,-dedi Bas dırektor.
Onyń aıtýynsha, munaı tasymaly salasyna ınjenerlik-tehnıkalyq mamandardy daıarlaý jobasyn «QazTransOıl» AQ Bilim jáne ǵylym mınıstrligimen birlese otyryp uıymdastyryp, osy jyldyń sáýir aıynda-aq iske asyra bastady. Joba 5 jylǵa eseptelip, ol boıynsha jylyna 400 den astam stýdentti qamtý kózdeldi. Stýdentterge arnalǵan shákirtaqy joǵarǵy oqý oryndary stýdentteri úshin 100 000 – 120 000 teńge aralyǵy, kolledj stýdentteri úshin 70 000 - 80 000 teńge arylyǵy, shákirtaqy kólemi stýdenttiń qaı aımaqta óndiristik tájirıbıesin ótip jatqanyna baılanysty bolady.
«Men Qaraǵandydaǵy joǵary polıtehnıkalyq kolledjde 3-kýrsta oqımyn. Bolashaq mamandyǵym – avtomehanık. Mine, eki aptadan beri QazTransOıldyń arnaıy tehnıka boıynsha tsehynda óndiristik tájirıbıeden ótip jatyrmyn. Kóp nárseni túıip aldym, kitaptaǵy oqyǵanymnyń óndiriste qalaı iske asatynyn óz kózimmen kórdim. Maǵan ásirese, munda tehnıkalyq qaýipsizdikti ustaný qatań saqtalatyny kóńilimnen shyqty. Meniń otbasym kópbalaly. Úıdegi balalardyń ishindegi úlkeni ózim. Tájirıbıe barysynda ózimdi jaqsy qyranan tanytyp, ózimnen keıingi ini-qaryndastaryma úlgi bolsam deımin», - deıdi stýdent praktıkant Nurlan Ábetov.
