«Qaztransoıl» 2013-2014 jyldary aktsıonerlerine 70 mlrd. teńge dıvıdent tóledi
ASTANA. QazAqparat - «Qaztransoıl» 2013-2014 jyldary aktsıonerlerine 70 mlrd. teńge dıvıdent tóledi. Bul týraly búgin QR Prezıdenti janyndaǵy ortalyq kommýnıkatsııalar qyzmetinde ótken brıfıngte «Qaztransoıl» AQ-nyń basqarma tóraǵasy Qaıyrgeldi Qabyldın málim etti.
«Búgingi tańda «Qaztransoıl» qarjylyq jaǵynan turaqty, ekonomıkalyq tartymdy bolyp otyr. Ótken jyldyń qorytyndysy boıynsha biz 63 mlrd. teńge taza tabys aldyq. Bul 2012 jylǵy kórsetkishpen salystyrǵanda shamamen 90 paıyzǵa artyq», - dedi Q.Qabyldın.
Bul rette onyń sózine qaraǵanda, kompanııa halyqtyq ІRO-ǵa shyǵar aldynda jarııa etken ınvestıtsııalyq memorandýmynda alynǵan tabystyń keminde 40 paıyzyn dıvıdentke jáne Qazaqstan Respýblıkasynyń azamattary bolyp tabylatyn aktsıonerlerge tóleýge kepildik bergen.
«2013-2014 jyldary ishinde aktsıonerlerdiń paıdasyna tólengen dıvıdentterdiń somasy 70 mlrd. teńgege jýyqtaıdy», - dedi ol.
