QazTransGazǵa ulttyq kompanııa mártebesi berildi

NUR-SULTAN. QazAqparat – «QazTransGaz» aktsıonerlik qoǵamyna ulttyq kompanııa mártebesi berildi. Bul jaıynda atalǵan kompanııanyń baspasóz qyzmetinen málim etti, dep habarlaıdy QazAqparat tilshisi.

«QR Úkimetiniń 2021 jylǵy 30 qarashadaǵy № 852 qaýlysymen «QazTransGaz» AQ-ǵa ulttyq kompanııa mártebesi berildi. Tıisti tolyqtyrý «Ulttyq basqarýshy holdıngterdiń, ulttyq holdıngterdiń, ulttyq kompanııalardyń tizbesin bekitý týraly» QR Úkimetiniń qaýlysyna engizildi. Sondaı-aq, QR Úkimetiniń № 853 qaýlysymen «QazTransGaz» aktsıonerlik qoǵamy «QazTransGaz» ulttyq kompanııasy» aktsıonerlik qoǵamy bolyp qaıta ataldy», - delingen kompanııa aqparatynda.

Sonymen qatar «Jer qoınaýy jáne jer qoınaýyn paıdalaný týraly» kodekstiń 278-babynyń 8-tarmaǵyna sáıkes QR Úkimeti jer qoınaýyn paıdalaný salasyndaǵy ulttyq kompanııalar qyzmetiniń arajigin ajyratýdy bekitti.

Osy qujatqa sáıkes, QazTransGazǵa gaz jáne gaz kondensatty ken oryndarynda barlaý jáne óndirý boıynsha basymdy quqyq berilip otyr.

Esterińizge sala ketsek, Qazaqstan men Reseıdiń XVII óńiraralyq yntymaqtastyq forýmynda QR Prezıdenti Qasym-Jomart Toqaev «Qaztransgaz» kompanııasyn reseılik «Gazprom» úlgisimen damytý múmkindigi týraly pikir bildirgen bolatyn.

«Biz «Qaztransgazdy» reseılik «Gazprom» sııaqty transformatsııalaý týraly sheshim qabyldadyq. Kompanııa tolyqqandy vertıkaldy ıntegratsııalanǵan ulttyq gaz kompanııasy bolady. Gazdyń resýrstyq bazasyn ulǵaıtý úshin Reseımen birlesken iri jobalardy – Hvalynskaıa jáne Imashınskaıa jobalaryn ýaqtyly júzege asyrýdyń mańyzy zor. «Gazprommen» kommertsııalyq máselelerdi tez arada sheshýge kelýdiń mańyzy zor, bul atalǵan jobalardy iske asyrýdy jedeldetedi», - degen edi Memleket basshysy.

Osylaısha, derbes ulttyq gaz kompanııasyna berilgen mártebe «QazTransGaz» AQ-ǵa úlken perspektıvalar ashpaq.

«Bul Qazaqstannyń gaz salasy úshin mańyzdy tarıhı sátterdiń biri. «QazTransGaz» táýelsizdik jyldary Ortalyq Azııadaǵy gaz aǵyndarynyń mańyzdy ári tehnologııalyq eń qýatty operatoryna aınaldy. Kógildir otyn, jylý men jaılylyq 9 mıllıonnan astam qazaqstandyqtyń úılerine jetti, shamamen 50 myńǵa jýyq kásiporyn tabıǵı gazdy paıdalanady. Bul - gaz mamandarynyń eldiń áleýmettik-ekonomıkalyq damýyna qosqan eleýli úlesi. Jaqyn arada kompanııanyń sheshýi qajet negizgi mindetter - bul gazdyń resýrstyq bazasyn arttyrý, taýarlyq gaz óndirisin yntalandyrý, qoldanystaǵy jáne jańa ken oryndarynda geologııalyq barlaý jáne gaz óndirý. Sonymen qatar eldiń gaz tasymaldaý jáne gaz taratý ınfraqurylymyn modernızatsııalaý kún tártibindegi másele sanalady», - dep atap ótedi kompanııadan.