QazTransGazAımaqtyń Qyzylorda fılıalyna 232 mln teńge aıyppul salyndy
Budan buryn, Tabıǵı monopolııalardy retteý komıtetiniń Qyzylorda oblysy boıynsha departamenti «QazTransGaz Aımaq» AQ-nyń Qyzylorda óndiristik fılıaly úshin taýarlyq gazdy gaz taratýshy júıeler arqyly tasylmaldaý qyzmetine 2020-2025 jyldarǵa uzaq merzimge tarıf bekitken.
2021 jyly júrgizilgen taldaý nátıjesinde, TMRKD «QazTransGaz Aımaq» AQ-nyń Qyzylorda fılıaly tarapynan 2020 jyly bekitilgen tarıftiń ornyna 2019 jyly qoldanysta bolǵan tarıfti qoldanyp, saldarynan 1,420 mlrd teńge negizsiz kiris alǵany anyqtaldy.
«Sonymen qatar, «QazTransGaz Aımaq» AQ-nyń Qyzylorda fılıalyna qatysty júrgizilgen jospardan tys tekseris nátıjesinde, 2021 jyldyń birinshi jartyjyldyǵynda bekitilgen tarıf taǵy da qoldanylmaı, ol 902, 613 mln teńge negizsiz kiris tapqany anyqtaldy. Sýbekt-monopolıstiń bul áreketteri «Tabıǵı monopolııalar týraly» Zańnyń 26-babynyń 2-tarmaǵynyń 3) tarmaqshasyna sáıkes zań buzýshylyq bolyp tabylady.
Osyǵan baılanysty, 2021 jyly «Ákimshilik quqyq buzýshylyq týraly» Kodekstiń 164-babynyń 5-bóligimen ákimshilik is qozǵalyp, olar quqyq qorǵaý organdarymen «QazTransGaz Aımaq» AQ-nyń Qyzylorda fılıalyna qatysty sotqa deıingi tergep-tekserý tirkelýine baılanysty qysqartylǵan bolatyn», - dep jazdy vedomstvodan.
Búgingi tańda, «QazTransGaz Aımaq» AQ-nyń Qyzylorda fılıalyna qatysty sotqa deıingi tergep-tekserý toqtatylyp, Ákimshilik quqyq buzýshylyq týraly kodekstiń negizinde ákimshilik ister qaıta qozǵalyp, sotqa máni boıynsha qaraý úshin joldanǵan.
Sot otyrystarynyń nátıjesinde Qyzylorda qalasynyń Ákimshilik quqyq buzýshylyqtar jónindegi mamandandyrylǵan sotynyń 2023 jylǵy 11 sáýirdegi qaýlylarymen «QazTransGaz Aımaq» AQ-nyń Qyzylorda fılıaly Ákimshilik quqyq buzýshylyq týraly kodekstiń 164-babynyń 5-bóligimen kináli dep tanylyp, oǵan jalpy somasy 232 292 872 teńge aıyppul salyndy.
Sottyń qaýlylary zańdy kúshine enbedi.
