«QazTransGazAımaq»-tyń Shymkenttegi fılıalyna 18,37 mln teńge aıyppul salyndy

NUR-SULTAN. QazAqparat – «QazTransGazAımaq» AQ-nyń Shymkent óndiristik fılıalyna qatysty tekserý qorytyndysy boıynsha Ákimshilik quqyq buzýshylyq týraly Kodekstiń 164-baby 4-bóligimen 4 hattama toltyryldy. Bul týraly Ulttyq ekonomıka mınıstrligi Tabıǵı monopolııalardy retteý komıteti málim etti, dep habarlaıdy QazAqparat.

«Hattamalar tabıǵı monopolııalar týraly zańnamada belgilengen mindetterdi oryndamaǵany úshin toltyryldy. «QazTransGaz Aımaq» AQ-nyń Shymkent óndiristik fılıaly berilgen tehnıkalyq sharttarǵa sáıkes qurylys-montajdaý jumystarynyń aıaqtalǵany týraly aqparat alyp, zańnamada belgilengen merzimderde rettelip kórsetiletin qyzmetke qosýdy júzege asyrmady. Bul – «Tabıǵı monopolııalar týraly» Zańnyń 24 jáne 26-baptaryn óreskel buzý», - delingen vedomstvo aqparatynda.

Ákimshilik isterdi Shymkent qalasynyń Ákimshilik quqyq buzýshylyqtar jónindegi mamandandyrylǵan aýdanaralyq soty qarady.

Sot sheshimimen «QazTransGaz Aımaq» AQ-nyń Shymkent óndiristik fılıalyna 18 378 000 teńge aıyppul salyndy.