«QazTransGazAımaq» Shymkent turǵyndaryna 166 mln teńgeni qaıtaryp beredi

ShYMKENT. QazAqparat - Shymkent tutynýshylaryna monopolıst qyzmeti úshin 166 mln teńgeden astam qarajat qaıtarylady, dep habarlaıdy QazAqparat tilshisi.

Tabıǵı monopolııalardy retteý komıtetiniń Shymkent qalasy boıynsha departamenti «QazTransGaz Aımaq» AQ Shymkenttik óndiristik fılıaly kórsetetin qyzmetteridiń birin tegin kórsetýge qol jetkizdi.

Tutynýshylardyń ótinishi negizinde jospardan tys tekserý nátıjesi boıynsha Tabıǵı monopolııalardy retteý komıtetiniń Shymkent qalasy boıynsha departamenti «QazTransGaz Aımaq» AQ Shymkenttik óndiristik fılıalyna qatysty jeke shkafty gaz retteý pýnkterin iske qosý-retteý úshin aqy alýdy toqtatý jáne negizsiz alynǵan tabysty tutynýshylarǵa qaıtarý týraly nusqama shyǵardy.

Sýbekt nusqamaǵa Shymkent qalasynyń mamandandyrylǵan aýdanaralyq ekonomıkalyq sotyna shaǵym túsirdi, alaıda sot shaǵymdy qanaǵattandyrmady.

Shymkent qalalyq soty azamattyq ister jónindegi sot alqasynyń qaýlysymen birinshi satydaǵy sottyń sheshimi kúshinde qaldy.

Endi gaz tutynýshylaryna jeke shkafty gaz retteý pýnktterin iske qosý úshin aqy tóleýdiń qajeti joq, al «QazTransGaz Aımaq» AQ ShÓF-y áreketinen zardap shekken tutynýshylarǵa jalpy somasy 166 680 500 teńge qarajat qaıtarylady.