«QazTransGazAımaq» AQ Jezqazǵan fılıalynyń basshysy turǵyndardan aqsha bopsalady degen kúdikke ilindi
«QazTransGazAımaq» AQ Jezqazǵan fılıalynyń basshysy men bas mamany qala turǵyndary men sharýashylyq sýbektilerinen 70-ten 300 myń teńgege deıingi mólsherdegi zańsyz aqshalaı syıaqy bopsalaǵan.
Bul týraly Kazinform QR Qarjylyq monıtorıng agenttiginiń baspasóz qyzmetine silteme jasap habarlaıdy.
Olar bul qarajatty gazdy qosý ruqsatyn jáne tehnıkalyq sharttardy jedel alý úshin talap etken.
Óńirdegi gazdandyrý salasyndaǵy júıeli problemalar QMA Ulytaý oblysy boıynsha departamentiniń áleýmettik jelilerge monıtorıng júrgizýi nátıjesinde anyqtaldy.
Oblys prokýratýrasynyń úılestirýimen ótkizilgen jedel is-sharalardyń nátıjesi boıynsha sotqa deıingi tergeý tirkeldi.
Atalǵan tulǵalarǵa qatysty «qamaýda ustaý» bultartpaý sharasy tańdaldy.
Tergeý jalǵasýda. QR QPK-niń 201-babyna sáıkes ózge de aqparat jarııalaýǵa jatpaıdy.
"QR Konstıtýtsııasynyń 77-babynyń 3-tarmaǵynyń 1-tarmaqshasyna jáne QR Qylmystyq-protsestik kodeksiniń 19-babynyń 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árkim kinásiz dep esepteledi",-delingen habarlamada.
