«QazTransGaz» kompanııasy bıyl da Buqara- Almaty gaz qubyrynyń qyrǵyzstandyq bóligin jóndeýge qarjy salady
ASTANA. Sáýirdiń 16-sy. QazAqparat /Ernur Aqanbaı/ - «QazTransGaz» AQ Almatyny gazben qamtamasyz etýde problema týyndamasy úshin bıyl da «Buqara-Tashkent-Bishkek-Almaty» magıstraldi gaz qubyrynyń qyrǵyzstandyq bóligindegi jóndeý jumystaryn qarjylandyratyn bolady.
Bul týraly búgin Astanada ótken baspasóz máslıhatynda «QazTransGaz» AQ Bas dırektory Serik Sultanǵalıev málim etti, dep habarlaıdy QazAqparat.
Onyń sózine qaraǵanda, «QazTransGaz» kompanııasynyń qyzmetkerleri osydan úsh-tórt jyl buryn atalmysh gaz qubyrynyń qyrǵyzstandyq bóligin aralap kórgenderinde, gaz magıstrali qubyrynyń is júzinde shirip bitkenin kórgen. Al Almaty qalasyn gazben qamtamasyz etý osy qubyrǵa táýeldi. Bul rette Almatyny gazsyz qaldyrmaý úshin «QazTransGaz» «Buqara-Tashkent-Bishkek-Almaty» magıstraldi gaz qubyrynyń uzyndyǵy 100 shaqyrymnan astam qyrǵyzstandyq bóligin jóndeý jumystaryna 3 mln. dollarǵa jýyq qarjy salǵan. Sóıtip eń qaýipti degen jerlerin jamaǵan. «Biz jýyrda ǵana atalmysh gaz qubyrynyń qyrǵyzstandyq bóligin jóndeý jumystaryna taǵy da qarjy salý jóninde sheshim qabyldadyq, sebebi biz áli qytaılyq gaz qubyryna qosylǵan joqpyz», dedi S. Sultanǵalıev. «Qazir Qyrǵyzstanda ne bolyp jatqanyn bilesizder. Ol eldegi jaǵdaı turaqtalmaıynsha biz árıne táýekelge barmaıtyn bolamyz. Alaıda, meniń oıymsha jaz mezgilinde biz bul jumysty qolǵa alatyn shaǵarmyz», dedi ol.
S. Sultanǵalıev Almaty qalasyn gazben qamtamasyz etý máselesi taıaý arada Túrikmenstan men Qytaıdy baılanystyratyn Ortalyq Azııalyq gaz qubyrynyń esebinen júzege asyrylatynyn atap ótti. «Ortalyq Azııalyq gaz qubyry iske qosyldy. Almatyny gazben qamtamasyz etý úshin eshqandaı da problema bolmasy úshin biz qazir atalmysh gaz qubyryna qosylý núktesin jobalap jatyrmyz», dedi ol.
