«QazTransGaz»-dyń byltyrǵy tabysy 2012 jylǵydan 80 paıyzǵa artyq - kompanııa basshysy
ASTANA. QazAqparat - «QazTransGaz» AQ kompanııalar toby boıynsha 2013 jylǵy taza tabys 51 mlrd. teńgeni qurap, 2012 jylǵy qorytyndydan 80 paıyzǵa joǵary bolǵan.
Bul týraly búgin «QazTransGaz» AQ-nyń 2013 jylǵy qarjy-sharýashylyq qyzmetiniń qorytyndylaryna arnalǵan baspasóz máslıhatynda kompanııanyń Bas dırektory Serik Sultanǵalı aıtty. Onyń sózine qaraǵanda, magıstraldyq gaz qubyrlary arqyly gaz tasymaldaý kólemi 110,14 mlrd. tekshe metrdi qurady. Bul kórsetkish 2012 jyly 109,19 mlrd. tekshe metr bolǵan. «Esepti kezeńde tabıǵı gaz tasymaldaý 11,998 mlrd tekshe metrdi qurady, bul 2012 jylǵydan 3,6 paıyzǵa kóp. Bul rette eksportqa gaz ótkizý jónindegi jospar 2 mlrd. 409 mln. tekshe metr gazdy quraı otyryp, 115 paıyzǵa oryndaldy. Bul 2012 jyldyń uqsas kórsetkishterinen 2 esege asyp tústi», - dedi kompanııa basshysy.
