«QazTransGaz Aımaq» jańa jylytý maýsymyna 72 paıyzǵa daıyn - Fedor Knaýer
ALMATY. 24 tamyz. QazAqparat /Názıra Eleýhan/ - «QazTransGaz Aımaq» AQ-nyń balansyndaǵy gaz taratý júıeleri men ilespe jabdyqtardyń 2011-2012 jylytý maýsymyna daıarlyq deńgeıi 72 % quraıdy. Kompanııanyń baspasóz qyzmetiniń habarlaýynsha, daıyndyq jumystary keste boıynsha júrgizilýde.
"Qys maýsymyndaǵy jumystarǵa daıyndyq belgilengen tártip boıynsha merzimdi jáne sapaly júrgizilýde. Qazir bekitilgen kesteden aýytqyǵan joqpyz. Gaz jabdyqtaý júıelerin daıyndaýǵa jáne kúzgi-qysqy maýsymdaǵy jumystarǵa kompanııa qyzmet kórsetetin óńirlerdegi jetekshi tehnıkalyq qyzmetter jumyldyryldy. Negizgi daıyndyq sharalary tehnıkalyq jumystardyń 21 túri boıynsha júrgizilýde. Barlyq óńirlerde GTP, ShTP men barlyq bekitý armatýralaryna aǵymdy jóndeý júrgizilýde, qudyqtardy tazalaý, jerasty gaz qubyrlaryna aspaptyq dıagnostıka, olardy qorǵaýdyń tıimdiligi baǵalanýda, qajet bolǵan jaǵdaıda jer ústi júıelerine de jóndeý júrgiziledi. Sondyqtan, bizde jylytý maýsymyna daıyndalyp úlgermeımiz degen kúdik joq»,-deıdi «QazTransGaz Aımaq» AQ óndiristik tehnıkalyq departamentiniń dırektory Fedor Knaýer.
Onyń aıtýynsha, qazirgi ýaqytta «QazTransGaz Aımaq» kompanııasy qyzmet kórsetetin óńirlerde 9,5 shaqyrym gaz qubyrlary jóndelip, qysqa daıyndyq sheńberinde 1298 shaqyrym jer asty júıelerine aspaptyq tekserý júrgizilgen. "Atalǵan saraptama qubyrlardyń búlingen bólikteri men qorǵanys qabatynyń sapasyn anyqtaýǵa jáne der ýaqytynda jóndeý júrgizýge múmkindik beredi. Jumystar barysynda jer asty júıeleriniń 2,7 shaqyrymdyq búlingen qorǵanys jabyndary qalpyna keltirilip, 1903 shaqyrym jer asty gaz qubyrlarynyń elektr-hımııalyq qorǵanysynyń tıimdiligi tekserildi. Bunymen qatar, 320 gaz taratý pýnktterine (GTP), 1221 katod stantsııalaryna (KS) jáne 3966 shkaftyq taratý pýnktterine (ShTP) aǵymdy jóndeý jumystary júrgizildi",-dedi ol.
Búginde "QazTransGaz Aımaq" AQ-y Qazaqstannyń gazdandyrylǵan toǵyz oblysynyń jeteýin tabıǵı gazben qamtamasyz etip keledi.
