«QazTransGaz Aımaq» tutynýshylardyń 268 mln teńgesin qaıtaryp beredi

ASTANA. QazAqparat - «QazTransGaz Aımaq» kásiporyny zańsyz eseptegeni úshin tutynýshylarynyń tólemderin qaıtaryp beredi, dep habarlaıdy «QazAqparat» HAA tilshisi QR Ulttyq ekonomıka mınıstrligi monopolııaǵa qarsy komıtetiniń baspasóz qyzmetine silteme jasap.

Komıtet «QazTransGaz Aımaq» AQ-yna qatysty básekelestikti qorǵaý salasyndaǵy zańnamalardyń buzylýyna tekserý júrgizdi. Tekseris nátıjesinde kásiporynnyń óziniń ústemdik jaǵdaıyn teris paıdalanǵandyǵy anyqtaldy.

«QazTransGaz Aımaq» gaz taýarlary tutynýshylaryna túzetý koeffıtsıentterin negizsiz eseptegen. Budan ózge kompanııa tutynýshylarmen ártúrli kelisimderge negizsiz jáne obektıvti sebeptersiz túrli sharttar qoldanǵan», - delingen habarlamada. 

Monopolııaǵa qarsy organmen gaz kompanııasyna qatysty ákimshilik is qozǵalyp, QR kásipkerlik kodeksiniń erejelerin buzýshylyqty toqtatý jáne onyń saldaryn joıý týraly buıryq shyǵaryldy.

Bes aıǵa sozylǵan sot tekserýleri nátıjesinde atalǵan derekter boıynsha Astana sottarynyń qaýlysymen kásiporyn ákimshilik jaýapkershilikke tartyldy, sondaı-aq, buıryq óz kúshinde qaldy.

Kásiporynǵa júktelgen aıyppul quny shamamen 13,4 mln teńgeni qurap, qazirgi ýaqytta bıýdjetke tolyq kólemde qaıtaryldy. Kompanııa málimetinshe, 2 mln tutynýshyǵa 268 mln teńge qaıtarylatyn bolady. Buıryqqa sáıkes, «QazTransGaz Aımaq»  kásiporyny aqshalaı qarajatty 2017 jyldyń 18 jeltoqsanyna deıin qaıtarýǵa tıis.