«QazTransGaz Aımaq» kompanııasyna eldiń úıine gaz kirgizýge tyıym salyndy

ASTANA. QazAqparat - Básekelestikti qorǵaý jáne damytý agenttigi ótken jylǵy qurylys-montajdaý naryǵyndaǵy básekelestiktiń jaı-kúıin tekserdi. Onyń barysynda «QazTransGaz Aımaq» AQ-nyń tutynýshylardyń úıishilik gaz jelisin tabıǵı gazǵa qosý kezinde qyzmet kórsetýi durys emestigi belgili boldy, dep habarlaıdy QazAqparat.

Osylaısha agenttik kompanııanyń merdigerleri men táýelsiz qurylysshylardyń qurylys-montajdaý jumystarynyń qunyna salystyrmaly taldaý júrgizdi.

Ol baǵalardyń salystyrmaly ekendigin jáne birdeı baǵa dıapazonynda ekenin kórsetti (keıbir óńirlerde aktsıonerlik qoǵam merdigerleriniń qyzmet quny jeke kompanııalardyń uqsas qyzmetterinen joǵary). Onyń gazdandyrý qarqynyna áseri shamaly.

Bul rette «QazTransGaz Aımaq» AQ usynatyn baǵa qurylys naryǵynda neǵurlym qoljetimdi usynystardyń bolýyna baılanysty damyǵan básekesi bar naryqtaǵy baǵanyń ındıkatory bola almaıdy.

Sondaı-aq, memlekettiń tikeleı aralasýynsyz gazdandyrý qarqynyn jedeldetý maqsatynda BQDA tarapynan tıisti memlekettik organdarǵa usynystar joldandy.

Joǵaryda aıtylǵandardyń negizinde 22 maýsymda BQDA aktsıonerlik qoǵamǵa QMJ naryǵynda, onyń ishinde osy jumystardy bógde uıymdardan satyp alý arqyly júzege asyrýdy toqtatý qajettigi týraly uıǵarym shyǵardy.

Nusqamany oryndaýǵa 15 kúntizbelik kún berildi.