«QazTransGaz Aımaq» AQ tutynýshylarǵa 268 mln. teńgeni qaıtarady
ASTANA. QazAqparat - «QazTransGaz Aımaq» AQ tutynýshylarǵa túzetý koeffıtsıentin negizsiz esepteýden túsken 268 mln. teńgeni qaıtarady, dep habarlaıdy QazAqparat QR Ulttyq ekonomıka mınıstrliginiń baspasóz qyzmetine siltememen.
Eske salsaq, 2017 jylǵy 14 aqpanda Astana qalasynyń Mamandandyrylǵan aýdanaralyq ákimshilik sotynyń (MAÁS) qaýlysymen «QazTransGaz Aımaq» AQ ústem jaǵdaıdy teris paıdalanǵany úshin, onyń ishinde gaz tutynýshylarǵa túzetý koeffıtsıentterin negizsiz eseptegeni úshin 13 mln. teńgeden astam aıyppul salynyp, ákimshilik jaýapkershilikke tartyldy. Sonymen birge «QazTransGaz Aımaq» AQ turmystyq jáne kommýnaldyq-turmystyq gaz tutynýshylaryna túzetý koeffıtsıentterin esepteý tájirıbesin toqtatýǵa, sondaı-aq 2012 jyldyń shilde aıynan bastap túzetý koeffıtsıentin esepteýden alynǵan qarjyny qaıtarý týraly nusqama berildi.
«QazTransGaz Aımaq» AQ-nyń derekteri boıynsha qaıtarylatyn soma shamamen 268 mln. teńgeni quraıtyn bolatyn.
Qarajatty qaıtarý boıynsha Tabıǵı monopolııalardy retteý, básekelestikti jáne tutynýshylardyń quqyqtaryn qorǵaý komıtetiniń nusqamasyn tolyq kólemde oryndamaǵany úshin, 2018 jylǵy 30 mamyrdaǵy Astana qalasynyń MAÁS qaýlysymen «QazTransGaz Aımaq» AQ-y 2,6 mln. teńgeden astam ákimshilik aıyppul salynǵan bolatyn.
Sonymen qatar, Monopolııaǵa qarsy komıtet sotqa «QazTransGaz Aımaq» AQ-dy tutynýshylarǵa qarajatty tolyǵymen qaıtarýǵa májbúrleý týraly aryz túsirdi.
2018 jylǵy 3 qazandaǵy Astana qalasynyń Mamandandyrylǵan aýdanaralyq ekonomıkalyq sotynyń sheshimimen «QazTransGaz Aımaq» AQ 2012 jylǵy shilde aıynan bastap turmystyq jáne kommýnaldyq-turmystyq tutynýshylarǵa túzetý koeffıtsıentin esepteýden alynǵan qarjyny qaıtarý týraly nusqamany oryndaýǵa májbúrleý týraly monopolııaǵa qarsy organnyń talaptary qanaǵattandyryldy.
2018 jylǵy 5 jeltoqsandaǵy sot sheshimi zańdy kúshine endi.
Osyǵan baılanysty, sot sheshimi negizinde tutynýshylar «QazTransGaz Aımaq» AQ-nyń tıisti óndiristik fılıaldaryna júginýge quqyly.
Sot sheshimimen Qazaqstan Respýblıkasy Joǵarǵy Sotynyń resmı saıtynda tanysýǵa bolady.
