«QazTransGaz Aımaq» AQ Mańǵystaý oblysynyń gazben jabdyqtaý naryǵynyń birińǵaı operatory boldy
ALMATY. 3 qyrkúıek. QazAqparat /Ádilet Musahaev/ - QR Úkimetiniń 14.09.2010 j. № 939 Qaýlysy jáne «QazTransGaz Aımaq» AQ men Mańǵystaý oblystyq ákimdigi arasynda qol qoıylǵan kelisimshartqa sáıkes, oblys aýmaǵyndaǵy 2470 shaqyrymdy quraıtyn gaz taratý qubyrlary «QazTransGaz Aımaq» AQ (ári qaraı - QTGA) senimdi basqarýyna berildi.
Buǵan deıin óńirdi gazben jabdyqtaý isimen, birneshe kommýnaldyq qyzmetterdi qosa atqaratyn 7 memlekettik kásiporyn aınalysyp kelgen bolatyn. Qyzmeti kópsalaly bul mekemeler turǵyndar men zańdy tulǵalarǵa gaz jetkizýdi ǵana júzege asyryp, qarjy jáne jumys kúshi jetispeýi sebepti, gaz júıelerine kúrdeli jóndeý júrgizilmegen.
Basqarýǵa berilgen gaz qubyrlary men qosalqy jabdyqtardy túgendeý jáne tehnıkalyq zertteý nátıjeleri kórsetkendeı, júıelerdiń 20%-dan astamy 25 jyldan astam ýaqyt boıy úzdiksiz paıdalanylyp keledi jáne jóndeý, jańartý jumystaryn júrgizý qajettiligi týyndap otyr.
Osylaısha, «QazTransGaz Aımaq» AQ Mańǵystaý óndiristik fılıaly óńirdegi gaz taratý jelileriniń jaǵdaıyn esepke ala otyryp, 2011 jyldyń sońyna deıin 400 mıllıon teńge kóleminde kúrdeli qurylys qarajatyn jumsaýdy kózdep otyr. Bul qarajat esebinen óńirdiń gaz sharýashylyǵynyń qalypty jumysyn qamtamasyz etý, jańartý jumystary atqarylmaq. Keń kólemdi jańartý jumystary oblystyń gaz qubyrlaryndaǵy tehnıkalyq shyǵyndardy azaıtyp, tasymaldaý, taratý júıesin ońtaılandyrýǵa jáne maýsymdyq otyn tapshylyǵyn joıýǵa múmkindik beredi.
Qazirgi kezdegi QTGA aldynda turǵan birinshi kezektegi mindet, aldaǵy jylytý maýsymyna daıyndyq, gazben jabdyqtaýdyń qaýipsizdigi men sapasyn qamtamasyz etý bolyp otyr.
Sonymen qatar, mamandardyń biliktiligin arttyrý maqsatymen bıylǵy jyldyń mamyr - tamyz aılary aralyǵynda «QazTransGaz Aımaq» AQ Mańǵystaý óndiristik fılıalynyń óndiristik qyzmetkerleri gaz jelileri men ondaǵy jabdyqtarda jumys isteýdiń halyqaralyq standartyna oqytyp úıretetin arnaıy kýrstardan ótkizildi.
«QazTransGaz Aımaq» AQ óńirdi gazben jabdyqtaıtyn biryńǵaı operator retindegi qyzmetteri QR 2015 jylǵa deıin gaz salasyn damytý Tujyrymdamasynyń, 2015 jylǵa deıin Mańǵystaý oblysynyń gaz salasyn damytý Tujyrymdamasynyń negizgi baǵyttary men mindetterine sáıkes keledi.
