«QazTransGaz Aımaq» AQ-ǵa 4 mln teńge aıyppul salyndy
QR Ulttyq ekonomıka mınıstrligi Tabıǵı monopolııalardy retteý komıtetiniń Atyraý oblysy boıynsha departamenti «QazTransGaz Aımaq» AQ-nyń Atyraýlyq fılıalyn «Ákimshilik quqyq buzýshylyq týraly» QR Kodeksiniń 164-babynyń 4-bóligine sáıkes ákimshilik jaýapkershilikke tartty. Kompanııaǵa 1600 AEK, nemese 4 040 000 tenge somasyna aıyppul salyndy.
Búginde aıyppul somasy memleket paıdasyna óndirilip alyndy.
Tabıǵı monopolııalardy retteý komıtetinen málim etkendeı, «QazTransGaz Aımaq»-tyń zań buzýshylyǵy tutynýshyǵa zań sheńberinen tys talaptar qoıýǵa qatysty bolǵan.
«Atyraýlyq fılıal Qazaqstan Respýblıkasynyń «Tabıǵı monopolııalar týraly» Zańynyń 24-babynyń 10-tarmaǵynyń 3) tarmaqshasynyń talabyn buzǵan, onda rettelip kórsetiletin qyzmetke qoljetimdilik usynylǵan kezde tabıǵı monopolııa sýbektisine, sonyń ishinde tabıǵı monopolııa sýbektisiniń jelilerine qosýǵa nemese rettelip kórsetiletin qyzmettiń kólemin ulǵaıtýǵa arnalǵan tehnıkalyq sharttardy saqtaýdan basqa, ózge talaptardy tutynýshyǵa qoıýǵa tyıym salynatyny aıtylǵan», - dedi komıtetten.
