«QazTransGaz» AQ «Túrkistan» kompressorlyq stansasyn iske qosty
TÚRKІSTAN. QazAqparat - Búgin «QazTransGaz» AQ «Túrkistan» Ulttyq gaz operatory kompressorlyq stansasyn iske qosty. Saltanatty rásimge oblys ákimi Janseıit Túımebaev pen «QazTransGaz» AQ Bas dırektorynyń birinshi orynbasary Qanat Qurmanalıev qatysty, dep habarlaıdy QazAqparat tilshisi.
Atalǵan stansanyń qurylysy «Beıneý-Bozoı-Shymkent» gaz qubyrynyń jyldyq ótkizý qabiletin jylyna 15 mlrd tekshe metrge deıin arttyrý jónindegi ınvestıtsııalyq jobanyń aıasynda iske asyryldy. Jańa stansanyń iske qosylýy gaz jáne gazben jabdyqtaý salasyndaǵy jyl saıyn ósip otyrǵan qajettilikterdi óteý úshin, ásirese jylytý kezeńinde eń kóp júkteme túsetin ýaqytta elimizdiń ońtústik óńirlerine gazdy toqtaýsyz tasymaldaýdy qamtamasyz etýge múmkindik beredi.
«Túrkistan» kompressorlyq stancasynyń qurylysy 7 aıdyń ishinde aıaqtaldy. Bul stansanyń salynýy oblystyń ekonomıkalyq damýyna eleýli úles qosatyn bolady. Máselen, qubyrdyń gaz ótkizý múmkindigi 5 mlrd tekshe metr kólemge artyp otyr. Sondaı-aq, stansada qazirgi tańda 50 shaqty azamat jumyspen qamtyldy. Osyndaı joǵary deńgeıdegi sapaly qurylysty iske qosqan «QazTransGaz» kompanııasy basshylyǵyna alǵys bildiremin. Bul oblys úshin eleýli oqıǵa», - dedi Janseıit Túımebaev. 
Aıta keteıik, bıylǵy jyldyń qazan aıynda otandyq gazdy Qytaıǵa eksporttaýdy eki esege arttyrý týraly kelisimshartqa qol qoıylǵan bolatyn. Sondyqtan «Beıneý-Bozoı-Shymkent» gaz qubyrynyń ótkizý qabiletin jylyna 10 mlrd tekshe metrden jylyna 15 mlrd tekshe metrge deıin arttyrady. Osy arqyly respýblıkanyń ońtústiginiń 5 mlrd tekshe metr kólemindegi kógildir otynǵa degen qajettiligi qamtamasyz etiledi. 10 mıllıard tekshe metr gaz eksportqa baǵyttalady.
Kompressorlyq stansalardy salý kezinde paıdalanylǵan ınnovatsııalyq jabdyqtar men kómekshi júıeler kesheni - magıstraldyq gaz qubyryn paıdalaný kezeńinde qaýipsiz ári tehnologııalyq turǵydan irkilissiz tasymaldaýdy qamtamasyz etpek.
