«QazTransGaz» AQ Grýzııadaǵy enshiles kásporyny «QazTransGaz-Tbılısı» JShS keleshegine qatysty kelissózderdi júrgizip jatyr

Bul týraly búgin Astanada ótken baspasóz máslıhatynda «QazTransGaz» AQ Bas dırektory Serik Sultanǵalıev málim etti, dep habarlaıdy QazAqparat.

Aıta keteıik, 2006 jyly Grýzııanyń aýmaǵynda «QazTransGaz» AQ 100 paıyzdyq qatasýymen «QazTransGaz-Tbılısı» JShS qurylǵan bolatyn.

S. Sultanǵalıevtiń aıtýynsha, qazirgi ýaqytta «QazTransGaz-Tbılısı» JShS keleshegine qatysty jaǵdaı kelissózder satysynda tur. Qazaqstan tarapy bul enshiles kásiporynǵa qatysty moınyna alǵan mindettemelerdi tolyǵymen oryndaǵan. Alaıda, grýzınder tarapynan obektıvti jáne sýbektıvti sebepterge baılanysty qol jetkizilgen ýaǵdalastyqtar oryndalmaı otyr. Kelisim boıynsha Ázirbaıjannan Grýzııaǵa arzan gaz jetkizilýi tıis, ony Grýzııa tarapy qamtamasyz etýge ýáde bergen. Sonymen qatar, kelisimde tarıfterdi qazirgi tańda Qazaqstanda qoldanylyp júrgen «qalypty mınımaldy deńgeıge kóterý» jaǵy da qarastyrylǵan. «Bul máseleler boıynsha ýaqytsha kidirýshilik týnyndap otyr. Qazirgi basty problema osy. Alaıda, ol keleshekte sheshiletin bolady. Qazir qol jetkizilgen ýaǵdalastyqtardy oryndaý úshin grýzın tarapymen kelissózder júrip jatyr. Biz Tbılısı qalasynyń gaz tasymaldaý júıesin qalyptandyrý jóninde moınymyzǵa mindetteme alǵan bolatynbyz, biz ózimizge qatysty kelisimderdiń barlyǵyn oryndadyq. Qysqa ýaqyttyń ishinde, 9 aıda barlyq gaz qubyrlaryn jónge keltirdik, gazdyń jınalymdylyǵyn 30 paıyzdan 90 paıyzǵa deıin jetkizdik jáne «QazTransGaz-Tbılısı» JShS tartymdy kompanııa jasadyq», dedi S. Sultanǵalıev.

Esterińizge sala keteıik, 2006 jyly «QazMunaıGaz» UQ enshiles kásiporyny «QazTransGaz» AQ Grýzııanyń gazben qamtamasyz etý júıesindegi «TbılGaz» kásiporynynyń aktıvterin ıelengen bolatyn. Grýzııa naryǵyna engennen beri «QazTransGaz» AQ «QazTransGaz-Tbılısı» kompanııasyna 100 mıllıon AQSh dollarynan astam ınvestıtsııa saldy. Atap aıtqanda, bul qarjy Tbılısı qalasyndaǵy gaz taratqysh júıesin jóndeý men jańartýǵa, gaz eseptegish quraldaryn satyp alý men ornatý jumystaryna jumsaldy. Nátıjesinde kompanııa tabıǵı gazdy joǵaltý úlesin 60 paıyzdan 20 paıyzǵa deıin tómendetti. Qazirgi ýaqytqa deıin «QazTransGaz-Tbılısı» kompanııasy atalǵan óńirdegi ekonomıkalyq aýyr jaǵdaı men tólemderdiń ýaqtyly jasalmaýyna qaramastan, tutynýshylarǵa gazdy tasymaldap otyr.

Al, 2009 jyly kóktemde «QazMunaıGaz» UK Prezıdenti Qaıyrgeldi Qabyldın Qazaqstan Grýzııadaǵy «QazTransGaz-Tbılısı» enshiles kompanııasyn satýǵa daıyn ekenin málimdegen bolatyn. «Biz kúzde «TbılGazdy» satýǵa daıyn ekenimizdi aıtqan bolatynbyz. Satyp alynǵannyń barlyǵy keıinnen satylady, alaıda máseleniń máni onyń baǵasynda. Atap aıtqanda, biz ony satýǵa ázirmiz, eger de bizdiń ınvestıtsııalyq salymdar, usynylǵan zaemdyq qarjylandyrý, munymen birge «QazTransGaz-Tbılısı» kompanııasyna jasalǵan qarjylyq kómektiń barlyǵy óteletin bolsa», - degen bolatyn Q. Qabyldın.