Kaztraffic-2025: 300-den asa kompanııa Astanada jol salasynyń ınnovatsııalaryn tanystyrady

ASTANA. KAZINFORM — 19–21 qarasha aralyǵynda Astana qalasyndaǵy EXPO halyqaralyq kórme ortalyǵynda Kólik mınıstrliginiń qoldaýymen «Kaztraffic-2025» HHІ Halyqaralyq kórmesi ótedi.

Kólik mınıstrliginiń málimetine sáıkes, atalǵan is-shara — TMD keńistigindegi jol qurylysy men ınfraqurylymyn damytýǵa arnalǵan eń iri jáne bedeldi salalyq kórme bolmaq.

Bıyl kórmege Qazaqstan, Qytaı, Túrkııa, Italııa, Frantsııa, Kanada, Ózbekstan jáne ózge elderden 300-den astam kompanııa qatysady.

Kórmede jol-qurylys tehnıkasy men materıaldarynyń sońǵy úlgileri, ǵylymı-zertteý ortalyqtarynyń jańa ázirlemeleri jáne ınnovatsııalyq tsıfrlyq sheshimder tanystyrylady. Qazaqstandyq ǵalymdar men ınjenerler ázirlegen birqatar jobalar alǵash ret kópshilik nazaryna usynylady.

Qazaqstan jol ǵylymı-zertteý ınstıtýty jol-qurylys materıaldarynyń biryńǵaı derekter bazasy, kópirlerdi paıdalaný júıesi jáne kóshe-jol jelisin basqarý jobalaryn tanystyrsa, Jol aktıvteriniń sapasy ulttyq ortalyǵy aqaýlardy avtomatty taný, tehnıkalyq qujattamany tsıfrlyq saraptaý jáne vırtýaldy trenajer sekildi tsıfrlyq júıelerdi kórsetedi.

Sonymen qatar «Astana Tazalyq» jasandy ıntellektke negizdelgen jańa býyndaǵy avtomattandyrylǵan tazalyq tehnıkasyn usynady. Kórmege álemniń túrli elderiniń jol ákimshilikteri, salalyq odaqtary men qaýymdastyqtary qatysady.

«Kaztraffic-2025» kórmesi aıasynda Qazaqstan jol ǵylymı-zertteý ınstıtýty men Jol aktıvteriniń sapasy ulttyq ortalyǵy ózderiniń jańa ázirlemeleri men zamanaýı sheshimderin usynady.

Qazaqstan jol ǵylymı-zertteý ınstıtýty kelesi jobalardy tanystyrady:

• jol-qurylys materıaldary men jańa tehnologııalardyń biryńǵaı derekter bazasy;

• kópir qurylystarynyń paıdalanylýyn basqarý júıesi;

• eldi mekenderdiń kóshe-jol jelisin uıymdastyrý jáne basqarý júıesi;

• Qazaqstan Respýblıkasynyń jol salasy mamandarynyń biryńǵaı bazasy;

Jol aktıvteriniń sapasy ulttyq ortalyǵy kelesi tsıfrlyq sheshimderdi usynatyn bolady:

• jumystar men materıaldardyń sapasyn saraptaýdy tsıfrlandyrý júıesi;

• jol-qurylys materıaldarynyń synamalaryn anonımdi tańbalaý júıesi;

• ortasha jóndeý jobalarynyń tehnıkalyq qujattamasyn qabyldaý jáne saraptaýǵa arnalǵan elektrondyq platforma;

• jol aqaýlaryn avtomatty taný júıesi;

• jolshy mamandardy oqytýǵa arnalǵan vırtýaldy trenajer;

• ortasha jóndeý jobalary boıynsha atqarýshy qujattamany baqylaýdyń aqparattyq júıesi.

Budan buryn Qazaqstan Shanhaıdaǵy kórmede tórt alańda óz ónimderin usynǵany habarlandy.