QAZTEST tapsyrý qansha turady jáne kimderge qajet
ASTANA. KAZINFORM — Qazaqstanda qazaq tilin meńgerý deńgeıin baǵalaýǵa arnalǵan QAZTEST sertıfıkattyq testileýine ótinim qabyldaý bastalady. Ulttyq testileý ortalyǵynyń málimetinshe, ótinimder 2026 jylǵy 9–15 qarasha aralyǵynda qabyldanady. Al testileý 17 qarashada elektrondy formatta ótedi.
Testileý Astana, Almaty, Shymkent, Aqtóbe, Aqtaý, Atyraý, Jezqazǵan, Kókshetaý, Qaraǵandy, Qostanaı, Qyzylorda, Óskemen, Oral, Petropavl, Pavlodar, Semeı, Taldyqorǵan, Túrkistan jáne Taraz qalalarynda uıymdastyrylady.
QAZTEST tapsyrýǵa nıetti azamattar app.testcenter.kz saıty arqyly tirkelip, ótinim bere alady.
Testileý tórt bólimnen turady:
- Tyńdalym — 20 test tapsyrmasy, oryndaý ýaqyty 20 mınýt;
- Oqylym — 40 test tapsyrmasy, oryndaý ýaqyty 50 mınýt;
- Jazylym — 2 tapsyrma, oryndaý ýaqyty 50 mınýt;
- Aıtylym — 2 tapsyrma, oryndaý ýaqyty 7 mınýt.
Sertıfıkat alý úshin testilenýshi tórt bólimniń árqaısysy boıynsha belgilengen shekti baldy jınaýy kerek.
«Jazylym» jáne «Aıtylym» bólimderiniń nátıjeleri testileý aıaqtalǵannan keıin 15 jumys kúni ishinde qatysýshynyń jeke kabınetinde jarııalanady.
Testileýge qatysý quny — 7 121 teńge.
QAZTEST sertıfıkaty kimderge qajet?
QAZTEST sertıfıkaty qazaq tilin meńgerý deńgeıin rastaý úshin birqatar memlekettik jáne bilim berý baǵdarlamalary aıasynda talap etiledi. Atap aıtqanda:
- «Bolashaq» halyqaralyq stıpendııasyna úmitkerlerden;
- Qazaqstannyń joǵary oqý oryndarynyń doktorantýrasyna túsýshilerden;
- Prezıdenttik jastar kadr rezervine úmitkerlerden;
- Qazaqstan Respýblıkasy Prezıdentiniń janyndaǵy Memlekettik basqarý akademııasyna túsýshilerden;
- memlekettik bilim berý uıymdarynyń birinshi basshysy laýazymyna úmitkerlerden.
Sondaı-aq QAZTEST sertıfıkaty keıbir memlekettik laýazymdar men baǵdarlamalarǵa úmitkerlerden de talap etiledi.
Aıtak keteıik, buǵan deıin «Bolashaq» baǵdarlamasymen oqý úshin QAZTEST talaptary qıyndaıtynyn jazdyq.
