«Qaztemirtrans» Almaty fılıaly dırektorynyń ustalýyna qatysty túsinikteme berdi
ASTANA. KAZINFORM — «Qaztemirtrans» AQ Almaty fılıalynyń dırektory A. Bazenovtyń quqyq qorǵaý organdary tarapynan ustalǵany týraly aqparat taralyp jatyr. Kompanııa osy aqparatqa qatysty resmı túsinikteme taratty.
Kompanııanyń málimetinshe, qazirgi ýaqytta quqyq qorǵaý organdary tıisti tergeý is-sharalaryn júrgizip jatyr. «Qaztemirtrans» ýákiletti organdarǵa jan-jaqty qoldaý kórsetip, tergeý aıasynda barlyq qajetti aqparat pen qujattardy usynyp otyrǵanyn habarlady.
Sonymen qatar, kompanııa fılıal nysandaryn kúzetý boıynsha memlekettik satyp alýda jeńiske jetýge kómekteskeni úshin iri kólemde zańsyz syıaqy aldy degen aqparat kúmán týdyratynyn málimdedi.
«Qaztemirtrans» dereginshe, qazirgi ýaqytta kúzet qyzmetterin kórsetýge qatysty kompanııa men kúzet uıymdary arasyndaǵy barlyq kelisimshart jasalyp, rásimder tolyq aıaqtalǵan.
Anyqtamaǵa sáıkes, kúzet qyzmetterine arnalǵan kompanııanyń jalpy bıýdjeti shamamen 200 mln teńgeni quraıdy. Al Almaty fılıaly boıynsha bıyl óndiristik bazalardy kúzetýge 9 mln teńgeden astam qarajat bólingen. Kompanııa bul soma aqparat keńistiginde taraǵan yqtımal para mólsherinen birneshe ese az ekenin atap ótti.
Sondaı-aq kompanııa zańdylyq, ashyqtyq jáne sybaılas jemqorlyqtyń kez kelgen kórinisine múldem tózbeýshilik qaǵıdattaryn ustanatynyn málimdedi. Eger zań buzý faktileri dáleldense, zańnamaǵa sáıkes barlyq shara qabyldanatyny aıtyldy.
Kompanııa istiń barlyq mán-jaıy jan-jaqty ári obektıvti túrde zertteledi dep úmittenetinin jetkizdi.
Qazirgi ýaqytta «Qaztemirtrans» qalypty rejımde jumys istep, óndiristik mindetterin jáne seriktester men klıentter aldyndaǵy mindettemelerin oryndaýdy jalǵastyryp jatyr.
Tergeý nátıjeleri týraly qosymsha aqparat belgilengen tártippen jarııalanatyny habarlandy.
Buǵa deıin Qaztemirtranstyń 4 qyzmetkeri para alǵany úshin sottalǵany týraly jazǵanbyz.
