«Qazteleradıo»AQ-y sandyq uıaly telehabar taratýshy DVB-H jáne sandyq efırlik DVB-T júıesin jasap shyǵardy
ALMATY. Qarashanyń 5-i. QazAqparat /Erbol Azanbek/ - Aldaǵy ýaqytta Qazaqstanda sandyq uıaly baılanys arqyly telehabar taratý jolǵa qoıylýy múmkin. Bul týraly búgin Almatyda «Qazteleradıo» AQ-y ókilderi málimdedi,
dep habarlaıdy QazAqparat.
«Qazteleradıo» ókilderiniń aıtýynsha, olar qazirgi tańda uıaly telehabar taratýshy DVB-H jáne sandyq efırlik DVB-T júıesin jasap shyǵarǵan. Búgin atalǵan júıeni tanystyrǵan kompanııa ókilderi bul eki júıeniń Qazaqstanda tuńǵysh ret jasalyp otyrǵanyn aıtty. Uıaly telehabar taratýshy DVB-H júıesi qazirgi tańdaǵy eń erekshe jobanyń biri. Óıtkeni bul júıe iske qosylsa turǵyndar qala aýmaǵynda uıaly telefon arqyly sandyq júıede telebaǵdarlamalardy 320 h 288 pıkseldik kórsetilimmen kóre alady.
«Ázirge bul pılottyq joba. Qazirgi tańda synaqtan ótýde. Aldaǵy ýaqytta tolyq paıdalanýǵa engizý úshin uıaly baılanys operatorlarymen kelisý arqyly arnaıy kodtardy engizý kerek. Qazirgi kezde olar 3G júıesin engizemiz dep qyzyǵýshylyq bildirip otyrǵan joq. Sondaı-aq uıaly baılanys telefondaryn óndirýshilermen kelisip, uıaly telefondarǵa sandyq habar taratýǵa múmkindik beretin modemderdi qoıý qajet. Qazirgi kezde bundaı uıaly telefondar bar. Alaıda olardyń baǵasy qymbattaý. Bunymen qatar DVB-H standartyn lıtsenzııalaý, taratylym júıesiniń standartyn lıtsenzııalaý sheshilgen joq. Eger bul máseleler sheshimin taýyp, uıaly baılanys operatorlary qyzyǵýshylyq bildirse, «Qazteleradıo» mobıldi habar taratý jıiligin usynýǵa daıyn» deıdi «Qazteleradıo»AQ-nyń bas tehnıkalyq dırektory Valerıı Platonov.
