«Qazteleradıoǵa» jańa basshy keldi

ASTANA. KAZINFORM – Qazaqstan Respýblıkasy Mádenıet jáne aqparat mınıstriniń buıryǵymen «Qazteleradıo» AQ Basqarma tóraǵasy laýazymyna Rýıslam Ábilqanuly Nurdáýlet taǵaıyndaldy.

Qazaqstan Respýblıkasynyń Mádenıet jáne aqparat vıtse-mınıstri Evgenıı Kochetov «Qazteleradıo» AQ ujymyna jańa Basqarma tóraǵasyn tanystyrdy.

Rýıslam Ábilqanuly Nurdáýlettiń joǵary zań jáne ekonomıkalyq bilimi bar. 

• Ál Farabı atyndaǵy Qazaq ulttyq ýnıversıtetin «Halyqaralyq quqyq» mamandyǵy boıynsha bitirgen (2001 j.).
• Qazaq ekonomıka, qarjy jáne halyqaralyq saýda ýnıversıtetin «Ekonomıka» mamandyǵy boıynsha aıaqtaǵan (2008 j.).

Jalpy jumys ótili 21 jyldan asty, onyń ishinde telekommýnıkatsııa salasynda 10 jyldan astam jumys isteıdi. Qyzmet istegen jyldarynda Rýıslam Ábilqanuly Nurdáýlet QR Qarjy mınıstrliginde, «Qazaqstan telekommýnıkatsııalary» AQ (Katelko), «QazMunaıGaz» AQ, «Samuryq-Qazyna» AQ-da jumys istep, memlekettik jáne korporatıvtik qurylymdarda basshy laýazymdardy atqardy.

2011 jyldan bastap «Qazteleradıo» AQ-nda túrli basshylyq laýazymdarda jumys isteıdi, onyń ishinde:

• Memlekettik organdarmen ózara is-qımyl qyzmetiniń bastyǵy;
• Fılıaldarmen jáne memlekettik organdarmen jumys departamentiniń dırektory;
• Basqarma tóraǵasynyń keńesshisi;
• Memlekettik organdarmen jumys jónindegi basqarýshy dırektor.

Rýıslam Ábilqanuly Nurdáýlettiń taǵaıyndalýy «Qazteleradıo» AQ-nyń turaqty damý strategııasyn jáne teleradıo habarlaryn taratýǵa zamanaýı tehnologııalardy engizýdi ustanatyndyǵyn aıǵaqtaıdy.

Eske sala keteıik, buǵan deıin Memleket basshysynyń Jarlyǵymen Ersaıyn Naǵaspaev Ónerkásip jáne qurylys mınıstri bolyp taǵaıyndalǵanyn jazǵan bolatynbyz.