«Qazteleradıo» AQ «Astana qalasyndaǵy radıohabar taratý jelisin jańartý» jobasyn qorytyndylady
ASTANA. QazAqparat - Qazaqstan Respýblıkasynyń teleradıohabar taratý salasynyń ulttyq operatory «Qazteleradıo» «Astana qalasyndaǵy radıohabar taratý jelisin jańartý (modernızatsııalaý)» jobasyn qorytyndylady. Sharaǵa habarlary «Astana» radıotelevızııalyq stansasynan taratylatyn teleradıokompanııalar men BAQ ókilderi.
Joba «Aqparattyq Qazaqstan-2020» strategııalyq baǵdarlamasy aıasynda júzege asyryldy.
«Qazteleradıo» AQ tehnıkalyq bas dırektory Bazarbek Qartjanovtyń sózine qaraǵanda, atalǵan jobanyń júzege asyrylýy nátıjesinde, elorda turǵyndary búgingi kúni jumys jasap jatqan radıohabarlardy jańa sapada tyńdap qana qoımaı, jańadan translıatsııalanatyn radıobaǵdarlamalardy tyńdaý múmkindigine ıe boldy. Teleradıohabar taratý salasyndaǵy zamanaýı qondyrǵylardy paıdalaný bas qalamyzdaǵy radıosıgnal tolqyny senimsiz «kóleńke aımaqtardy» joıýǵa múmkindik berdi. Eger bul jumystarǵa deıin memlekettik «Qazaq radıosy» men «Shalqar» radıobaǵdarlamalary Astana qalasyna irgeles jatqan 33 eldi mekenge taralsa, búginde olardyń sany 54-ke jetti. «Astana» radıotelevızııalyq stansasynan sapaly radıohabardy taratý úshin «Qazteleradıo» AQ qyzmetkerleri qabyldaý-taratý qondyrǵylaryn jańa tehnıkalyq talaptarǵa sáıkestendirip, sandyq teleradıohabar taratýdy baqylaý men monıtorıngteý júıesimen baılanystyrdy. Bul paıdalanyp otyrǵan qondyrǵylardy koldaný men jóndeý jumystaryn jeńildetip qana qoımaı, radıohabar taratý jumysynyń sapasyn arttyrady. Búgingi tańda «Astana» RTS-nan zamanaýı qondyrǵylardy paıdalana otyryp, 12 otandyq radıoarna translıatsııalanady. Olardyń qatarynda tanymal «Qazaq radıosy», «Shalkar», «Klassık FM», «Astana FM», «Tengrı FM», «Radıo NS», «Love Radio», «ORDA FM», «Rýsskoe Radıo», «Retro FM», «Avtoradıo Qazaqstan» jáne «Juldyz» radıolary bar.
