Qaztalov aýdanynda 22 adamǵa 92,2 mln teńge nesıe berildi - BQO
ORAL. QazAqparat - Qaztalov aýdanynda Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasy aıasynda 22 adamǵa 92,2 mln teńge nesıe berildi, dep habarlaıdy «QazAqparat» tilshisi.
Aýdandyq halyqty jumyspen qamtý ortalyǵynyń dırektory Júsip Shaqýovtyń aıtýynsha, bıyl atalmysh baǵdarlamanyń «Jappaı kásipkerlikti damytý» 2-baǵyty boıynsha bul maqsatqa aýdanǵa 87,542 mln teńge qaralǵan bolatyn. Sonda aýyl turǵyndary «Aýyl sharýashylyǵyn qarjylaı qoldaý qory» AQ arqyly nesıege artyǵymen qol jetkizip otyr. Osy qarjyǵa olar 291 bas iri qarany enshileýi kerek bolsa, qazirdiń ózinde 118 basty satyp aldy. Oǵan qosa 123 adam «Bastaý bıznes» jobasy boıynsha kásipkerlik negizderin oqytýǵa jiberildi.
«Baǵdarlamaǵa qatysýshylardy tehnıkalyq jáne kásiptik bilimmen jáne qysqa merzimdi kásiptik oqýmen qamtamasyz etý» 1-baǵyty boıynsha qysqa merzimdi kásibı oqý úshin 37,523 mln teńge qaraldy. Jospar boıynsha 210 adamdy oqytý kózdelse, kúni búgin 164 adam aspaz, mehanızator, shashtaraz, gaz qondyrǵysynyń operatory sekildi mamandyqtar boıynsha oqýǵa joldandy. Áleýmettik jumys oryndaryna turǵyndardy jiberý úshin respýblıkalyq jáne jergilikti bıýdjetten 10,428 mln teńge berilip, qazirdiń ózinde 59-dyń ornyna 61 adam jeke kásipkerler men sharýa qojalyqtarynyń suranystary boıynsha óz oryndaryn tapty. Sondaı-aq jastar tájirıbesine 23,371 mln. teńge bólingen bolatyn. Bul boıynsha 84-tiń ornyna 104 adam jiberildi. 
Halyqty jumyspen qamtýdyń bir joly - bos jumys oryndarynyń jármeńkesi. Mysaly, aýdandyq halyqty jumyspen qamtý jáne áleýmettik baǵdarlamalar bólimi 25 tamyz kúni uıymdastyrǵan osyndaı sharada 40 jumys berýshi 97 bos jumys ornyn usyndy. Jármeńkege qatysqan 122 jumyssyzdyń 37-si óz mamandyqtary boıynsha jumysqa ornalastyryldy.
Aıta keteıik, atalmysh bólimge jyl basynan beri 929 adam jumys izdep, ótinish bildirse, sonyń 490-y bos oryndarǵa, áleýmettik jumys oryndary men jastar tájirıbesi boıynsha eńbek ornyn tapty.
