QazTAG HAA qyzmetteri tehnıkalyq ereksheligine saı emes, al esepteme jalǵan málimetterge qurylǵan - kýáger
ASTANA. QazAqparat - Memlekettik-aqparattyq saıasat boıynsha QazTAG HAA JShS kórsetken qyzmetter tehnıkalyq erekshelikke jáne bekitilgen shartqa saı bolmaǵan, al eseptemede jalǵan málimetter qamtylǵan.
Bul týraly Seıitqazy jáne Áset Mataevtardyń isine qatysty sot protsesi barysynda Aqparat, aqparattandyrý jáne baılanys komıteti tóraǵasynyń burynǵy orynbasary Erkeǵalı Korbozov málimdedi.
Kýáger Komıtet jetekshiliginiń QazTAG HAA esepterine «kóz juma» qaraýǵa tapsyrma bergenin, qyzmet kórsetýde agenttik sıpattamalar sany talabyn saqtamaǵanyn, keıbir aqparattyq materıaldardy QazTAG HAA JShS ortaq paıdalaný rejiminen tys jarııalaǵanyn aıtty.
E.Korbozovtyń sózine qaraǵanda, QazTAG HAA JShS kórsetken qyzmetter tehnıkalyq erekshelikke jáne bekitilgen shartqa saı bolmaǵan, al eseptemeler jalǵan málimetterge qurylǵan. «QazTAG-qa kórsetken qyzmetteri úshin qarajat negizsiz tólengen, al memlekettik-aqparattyq saıasat nátıjelerine qol jetkizilmedi», - dedi ol.
Tergeý málimetteri boıynsha, 2010-2015 jyldary Seıitqazy Mataev óz uly - QazTAG HAA JShS bas dırektory Áset Mataevpen birge aldyn ala sóz baılasqan toppen memlekettik satyp alýlar salasynda aldaý jáne senimge kirý jolymen asa iri kólemdegi bıýdjet qarajatyn jymqyrǵan. Jymqyrylǵan qarajat kólemi 169 mıllıon teńgeni quraǵan.
Taǵy bir kýáger - Baılanys, aqparattandyrý jáne aqparat komıtetiniń burynǵy tóraǵasy Talǵat Qazanǵap sotta komıtet basshylyǵynyń tek qana QazTAG HAA-men kelisimshart jasalýyna jaǵdaı jasaǵanyn málimdedi.
Talǵat Qazanǵaptyń aıtýynsha, Seıitqazy Mataev úshin 2014 jylǵa lottardy bólý tek formaldy sıpatta ǵana boldy.
«Jarııalanǵan baıqaýǵa ózge jetkizýshilerdi qatystyrmaý úshin №2 lottyń tehnıkalyq ereksheligine materıaldardy Ortalyq Azııa elderindegi KırTAG, AfTAG, ÝzTAG jáne TadjıkTAG ınternet resýrstaryna jarııalaý sekildi qosymsha talaptar engizildi, sebebi bul qyzmetti tek «QazTAG HAA» JShS iske asyra alady», - dedi Talǵat Qazanǵap.
Onyń aıtýynsha, aldyn ala josparlanǵandaı, elektrondy konkýrs ótkizý barysynda №2 lotqa tek qana «QazTAG HAA» JShS jetekshisi Áset Mataev ótinim bergen.
«Aktiler men eseptemelerdi qabyldap, qol qoıdym. Biraq, S.Mataevtyń bedeline senim artyp, atqarý kólemi, esepterdiń durystyǵy jáne tehnıkalyq erekshelik pen shart talaptaryna sáıkestigin teksergen joqpyn», - dep uǵyndyrdy kýáger.
Talǵat Qazanǵaptyń nusqaýymen atalǵan aktilerge onyń qol astyndaǵy qyzmetkerler de qol qoıǵan.
2015 jyly satyp alýlar men jumystar baıaǵy stsenarıımen júzege asqan. Jymqyrylǵan aqshanyń jalpy kólemi 169 mıllıon teńgeni quraǵan.
