«Qazsýsharýashylyǵynyń» ýchaske bastyǵy sottaldy

NUR-SULTAN. QazAqparat – «Qazsýsharýashylyǵy» RMK Qaraǵandy fılıaly Abaı bólimshesiniń ýchaske bastyǵy alaıaqtyq úshin sottaldy. Bul týraly QazAqparat Sybaılas jemqorlyqqa qarsy qyzmetine silteme jasap habarlaıdy.

Qaraǵandy oblysynyń Sybaılas jemqorlyqqa qarsy qyzmeti osyǵan deıin «Qazsýsharýashylyǵy» ShJQ RMK Qaraǵandy fılıaly Abaı bólimshesiniń ýchaske bastyǵy A.Shalabaevaǵa qatysty sotqa deıingi tergeýdi aıaqtady.

Shalabaeva sotqa deıingi tergeý barysynda atalǵan ýchaskede jol salý jáne qaıta jóndeý úshin bólingen 5 575 740 teńge somasyndaǵy bıýdjet qarajatyn alaıaqtyq jolmen ıemdengeni úshin kúdikti bolǵan.
Shalabaeva aǵymdaǵy jyldyń 10 naýryzynda Qaraǵandy qalasynyń Qazybek bı aýdandyq sotynyń úkimimen 3 jyl, 6 aıǵa bas bostandyǵyn shekteý jazasyna sottaldy.
Oǵan qatysty kórsetilgen merzimge probatsııalyq baqylaý belgilendi.