«Qazsýshar» Túrkistan fılıaly eki óndiristik ýchaskesiniń basshylary jumystan ýaqytsha shettetildi
TÚRKІSTAN. KAZINFORM – Túrkistan oblysynda «Qazsýshardyń» jergilikti fılıalynyń Shardara jáne Maqtaaral óndiristik ýchaskeleriniń basshylary jumystan ýaqytsha shettetildi. Buǵan deıin olar qatań sógis alǵan bolatyn.
Sý resýrstary jáne ırrıgatsııa mınıstrligi málimetinshe, buǵan aýdandarda anyqtalǵan buzýshylyqtar sebep boldy. Atap aıtqanda, Túrkistan oblysynda kúrish egý jospary 3,3 eseden asyp ketken. Sýarmaly sý tapshylyǵy qaýpine jáne 4000 ga shegine qaramastan, «Qazsýshardyń» jergilikti fılıaly dıqandarmen 13 258 ga kúrish alqaptaryn sýarýǵa 1 047 kelisimshart jasasqan.
Sý resýrstary jáne ırrıgatsııa mınıstri Nurjan Nurjigitovtiń óńirge jumys sapary jalǵasyp jatyr. Sý vedomstvosynyń basshysy Shardara aýdanyndaǵy sý sharýashylyǵy jaǵdaıymen tanysty.
Búgingi tańda Qyzylqum kanaly kúrish, júgeri, maqta, kókónister, jońyshqa, júzim, baý-baqsha daqyldary ósiriletin 28 366,1 ga jerge sý jetkizdi. Vegetatsııa kezeńi bastalǵaly beri kanal arqyly sý berýge 2 978 kelisimshartqa qol qoıyldy.
– Mınıstrliktiń jumys toptary táýlik boıy kezekshilik júrgizip, óńir kanaldaryndaǵy sý deńgeıin baqylaýda ustap otyr. Sý berý kezekpen júrgizilip, sharýalarmen túngi sýarýǵa kóshý jáne egis aınalymy boıynsha túsindirý jumystary júrgizilip jatyr. Dese de sýdyń «kóleńkeli naryǵyn» joıý máselesi ózekti bolyp qala beredi. Shardara sý qoımasynyń mańynda 24 zańsyz sorǵy qondyrǵysy anyqtaldy. Buǵan deıin biz zańsyzsý alýmen tıimdi kúresý úshin oblystyń quqyq qorǵaý organdarymen kúsh biriktirdik, - dedi Sý resýrstary jáne ırrıgatsııa mınıstri Nurjan Nurjigitov.
Sondaı-aq mınıstr Shardara toptyq sý qubyry qurylysynyń barysymen tanysty.
Jobany 2026 jyly aıaqtaý josparlanyp otyr. Nysannyń uzyndyǵy - 39,28 km. Joba aıasynda I jáne II kótergish sorǵy stantsııalaryn salý, sondaı-aq segiz uńǵymany burǵylaý josparda bar.
Qýattylyǵy táýligine 12 myń tekshe metr sý qubyry Shardara qalasynyń jáne jaqyn mańdaǵy 22 eldi mekenniń turǵyndaryn «Shardara-Baıyrqum» jerasty kózinen sýmen qamtamasyz etedi.
BQO «Qazsýshar» fılıaly tasqyn sýdy óńirdegi kólderge jiberip jatqanyn jazǵan edik.