«Qazsýshar» tsıfrlandyrý arqyly shyǵyndaryn azaıtty
ASTANA. KAZINFORM — «Qazsýshardy» transformatsııalaý shyǵyndardy tolyq joıýǵa múmkindik berdi
Memleket basshysynyń tapsyrmasyn iske asyrý aıasynda Sý resýrstary jáne ırrıgatsııa mınıstrligi elimizdiń sý sharýashylyǵyn basqarý júıesin reformalaý boıynsha jumys júrgizdi. Onyń ishinde salanyń negizgi kásiporyndaryn «qaıta jańǵyrtý», sondaı-aq búkil salanyń materıaldyq-tehnıkalyq bazasy men kadrlyq áleýetin kúsheıtý sharalary qolǵa alyndy.
Atap aıtqanda, «Nura toptyq sý qubyry» RMK «Qazsýshar» RMK-men biriktirildi. Sonymen qatar kásiporynnyń beıindi emes aktıvterin, onyń ishinde toptyq sý qubyrlaryn kommýnaldyq menshikke berý jónindegi Jol kartasy bekitilip, iske asyrylyp jatyr.
Budan bólek, «Qazsýshar» RMK jarǵylyq qyzmet túrlerin keńeıtý jumystaryn qolǵa aldy. Al ashyqtyqty arttyrý maqsatynda jyl basynan beri kásiporynda sýarý sýy úshin qolma-qol tólem jasaý tolyǵymen toqtatyldy. 2026 jyly sý tutynýshylarmen jasalatyn barlyq shart jańa bıllıng júıesi arqyly elektrondy formatta jasalady.
Qabyldanǵan keshendi sharalardyń nátıjesinde kásiporyn shyǵyndardy tolyq joıyp, ótken jyldy paıdamen aıaqtady. Debıtorlyq bereshek 90%-ǵa azaıdy.
— «Qazsýshar» RMK-ny reformalaý bıznes-protsesterdi qaıta qurý men avtomattandyrýdy, fılıaldardyń qyzmetin josparlaý jáne tıimdiligin baǵalaý júıesin qalyptastyrýdy, kiris pen shyǵysty basqarýdy ortalyqtandyrýdy, jobalyq basqarý qaǵıdattaryn engizýdi jáne jarǵylyq qyzmet túrlerin keńeıtýdi qamtıdy. Sonymen qatar kásiporynnyń tehnıkalyq parki jańartylyp jatyr. Byltyrdyń qorytyndysy boıynsha tehnıka parkiniń 27%-y jańartyldy, — dedi Sý resýrstary jáne ırrıgatsııa vıtse-mınıstri Jandos Sálimov.
Aıta ketelik «Qazsýshar» RMK qaramaǵyndaǵy 32 sý sharýashylyǵy nysanynda shaǵyn GES salynady.
