«Qazsýshar» sý berýdi tsıfrlandyrdy: bıyl sharýalarmen 29 myńnan astam shart jasaldy
ASTANA. KAZINFORM — Qazaqstanda sýarmaly sý alýǵa kelisimshart jasasý tolyqtaı elektrondy formatqa kóshti. Jańa júıeniń arqasynda bıyl sharýalarmen 29 283 kelisim jasalyp, byltyrǵy kórsetkishten 2 570-ke artty. Bul týraly Sý resýrstary jáne ırrıgatsııa mınıstrligi málim etti.
Bıyl sýarmaly sý berý boıynsha «Qazsýshar» RMK-men kelisimshart jasasý protsesi alǵash ret tolyqtaı tsıfrlyq formatqa kóshirildi. Bul úshin Sý resýrstary jáne ırrıgatsııa mınıstrliginiń Sý resýrstarynyń aqparattyq-taldaý ortalyǵy ázirlegen jańa bıllıng júıesi engizildi.
— Bıllıng júıesiniń iske qosylýy kelisimshart jasasý jáne qujattarmen jumys isteý protsesin jeńildetip, sý paıdalanýdyń ashyqtyǵyn arttyrdy. Sonymen qatar zańsyz paıdalaný táýekelderin barynsha azaıtýǵa, tutynýshylardyń «Qazsýshar» RMK aldyndaǵy bereshegin qysqartýǵa jáne ońtústik óńirlerde sý paıdalaný lımıtteriniń saqtalýyn qamtamasyz etýge múmkindik berdi, — delingen habarlamada.
Nátıjesinde Qazaqstannyń aýyl sharýashylyǵy taýaryn óndirýshilerimen 29 283-ten astam elektrondy kelisim jasaldy. Bul ótken jylmen salystyrǵanda 2 570 kelisimge artyq.
— Qazirgi ýaqytta bıllıng júıesin odan ári jetildirý jumystary josparlanyp otyr. Sondaı-aq mınıstrlik bul quraldy kanaldar arqyly sý berý qyzmetin kórsetetin basqa da uıymdarmen kelisimshart jasasý protsesine engizýdi kózdep otyr, — dedi Sý resýrstary jáne ırrıgatsııa vıtse-mınıstri Aslan Abdraımov.
Buǵan deıin Qazaqstannyń 23 myńnan astam sý nysany tsıfrlyq baqylaýǵa alynǵanyn jazdyq.
