«Qazsýshar» RMK-nyń bas dırektory taǵaıyndaldy
ASTANA.KAZINFORM - Ánýar Óskenbaev «Qazsýshar» RMK-nyń bas dırektory bolyp taǵaıyndaldy. Bul týraly Sý resýrstary jáne ırrıgatsııa mınıstrligi habarlady.
Ánýar Áýezuly 1976 jyly dúnıege kelgen.
1998 jyly M.H.Dýlatı atyndaǵy Taraz memlekettik ýnıversıtetin, 2003 jyly J.Balasaǵun atyndaǵy Qyrǵyz ulttyq ýnıversıtetin aıaqtaǵan.
Eńbek jolyn 2000 jyly «Qazfosfat – NDF» JShS-niń Eńbekti qorǵaý jáne qaýipsizdik tehnıkasy bóliminde slesar-jóndeýshi, keıin ınjener qyzmetinen bastaǵan. Keıin Astana qalasyndaǵy «Jolaýshylar tasymaly» EMK-de óndiristik-tehnıkalyq bólimniń ınjeneri bolyp jumys istegen.
2005-2007 jyldary Qazaqstan Indýstrııa jáne saýda mınıstrliginiń Básekelestikti qorǵaý komıtetinde aldymen bas maman, keıin talap-aryz jumysy bóliminiń basshysy qyzmetterin atqarǵan.
2007-2013 jyldary Respýblıkalyq bıýdjettiń atqarylýyn baqylaý jónindegi Esep komıtetinde eńbek etip, bas sarapshydan zań bóliminiń meńgerýshisine deıingi qyzmettik joldan ótti. Ár jyldary Almaty qalasy ákimi apparaty basshysynyń orynbasary, Almaty qalasynyń Turǵyn úı basqarmasynyń basshysy, sondaı-aq Almaty qalasy Áýezov aýdanynyń ákimi qyzmetterin atqarǵan.
2021-2025 jyldary «Qazaqstan ekonomıkalyq bastamalar qory» korporatıvtik qorynyń dırektory boldy.
2025 jylǵy aqpan aıynan bastap osy ýaqytqa deıin «Qazsýshar» RMK bas dırektorynyń aktıvterdi basqarý jónindegi orynbasary qyzmetin atqardy. Al byltyr qazan aıynan beri «Qazsýshar» RMK bas dırektorynyń mindetin ýaqytsha atqaryp keldi.
Aıta keteıik, bıyl «Qazsýshardyń» tehnıka parki alty jańa kememen tolyǵady.
