«Qazsýshar» RMK qaramaǵyndaǵy 32 sý sharýashylyǵy nysanynda shaǵyn GES salynady
ASTANA. KAZINFORM — «Qazsýshar» RMK-nyń sý sharýashylyǵy nysandarynda shaǵyn gıdroenergetıkanyń áleýetin arttyrý jónindegi Jol kartasy aıasynda shaǵyn GES salý úshin 32 nysan irikteldi.
Birinshi kezeńde bes nysanda shaǵyn gıdroelektr stantsııalaryn salý josparlanyp otyr. Olar: Qaraǵandy oblysyndaǵy Samarqand sý qoımasy, Aqtóbe oblysyndaǵy Qarǵaly sý qoımasy, Abaı oblysyndaǵy Qarakól sý qoımasy, sondaı-aq Qostanaı oblysyndaǵy Qaratomar jáne Joǵarǵy Tobyl sý qoımalary.
Sý resýrstary jáne ırrıgatsııa mınıstrligi málimetinshe, bul stantsııalardyń jalpy qýaty shamamen 9 MVt bolady. Ekinshi kezeńde 18 nysanda jalpy qýaty shamamen 25 MVt bolatyn GES salý kózdelgen. Úshinshi kezeńge áleýeti bar 9 nysan engizildi. Onyń altaýy Abaı jáne Shyǵys Qazaqstan oblystarynda josparlanyp otyrǵan jańa sý qoımalarynda ornalasady.
– Birinshi jáne ekinshi kezeńder boıynsha qajetti qujattar ázirlenip, jobalardy iske asyrý máseleleri pysyqtalyp jatyr. Qazirgi ýaqytta «Qazsýshar» RMK balansynda Soltústik Qazaqstan jáne Qaraǵandy oblystarynda, sondaı-aq transshekaralyq Qorǵas ózeninde jalpy qýaty shamamen 5 MVt bolatyn úsh shaǵyn GES bar,– dedi Sý resýrstary jáne ırrıgatsııa mınıstri Nurjan Nurjigitov.
Aıta keteıik, ShQO-daǵy GES kaskady strategııalyq mańyzy bar qurylystar tizimine endi.
