«Qazsýshar» qyzmetkerleriniń jalaqysy eki esege artty
ASTANA. KAZINFORM — Sý resýrstary jáne ırrıgatsııa mınıstrligi qurylǵaly beri «Qazsýshar» RMK qyzmetkerleriniń jalaqysy eki esege ósti.
Sý resýrstary jáne ırrıgatsııa mınıstrligi qurylǵannan beri sý sharýashylyǵy salasy qyzmetkerleriniń jalaqysyn arttyrý jáne eńbek jaǵdaıyn jaqsartý baǵytynda keshendi sharalar júzege asyrylyp keledi. Atap aıtqanda, sońǵy 2,5 jylda egistikti sýarý úshin sý berý qyzmetin kórsetetin «Qazsýshar» RMK mamandarynyń jalaqysy orta eseppen eki esege artty.
2024 jyly kásiporyn qyzmetkerleriniń eńbekaqysy orta eseppen 25%-ǵa ósti. 2025 jylǵy 1 shildeden bastap jalaqy taǵy 35-50%-ǵa, al 2026 jylǵy 1 sáýirden bastap qosymsha 15%-ǵa kóterildi.
Qazir «Qazsýshar» RMK qyzmetkerleriniń ortasha jalaqysy 326 myń teńgeni quraıdy. Al eń tómengi jalaqy 85 myń teńgeden 212 myń teńgege deıin ósti.
— Sonymen qatar qyzmetkerlerdi áleýmettik qoldaý sharalary da engizilip jatyr. Máselen, 2024 jyly sý sharýashylyǵy mamandyqtary alǵash ret «Dıplommen — aýylǵa» memlekettik baǵdarlamasyna engizildi. Al byltyr «Qazsýshar» RMK qyzmetkerleriniń eńbek jaǵdaıyn jaqsartý maqsatynda kásiporynǵa 576 jańa tehnıka berildi. Budan bólek, tarıftik qarajat esebinen taǵy 135 tehnıka satyp alyndy. Bul kásiporynnyń tehnıka parkin 27%-ǵa jańartýǵa múmkindik berdi. Sonymen qatar «Qazsýshar» RMK-nyń 435 maýsymdyq qyzmetkeri turaqty jumys oryndarymen qamtamasyz etildi, — dedi Sý resýrstary jáne ırrıgatsııa mınıstri Nurjan Nurjigitov.
Budan buryn «Qazsýshar» fılıaldaryna jeti jańa jersnarıad beriletini aıtyldy.
