«Qazsýshar» aldyndaǵy dıqandardyń bereshegi 1 mlrd teńgege jýyqtady
ASTANA. KAZINFORM — Sýarmaly sý jetkizý qyzmetin alǵan sý tutynýshylardyń «Qazsýshar» aldyndaǵy bereshegi shamamen 1 mlrd teńge.
Sý tutynýshylardyń «Qazsýshar» RMK aldyndaǵy sýarmaly sý jetkizý qyzmeti boıynsha debıtorlyq bereshegi 966 mln teńgeden asady.
Kásiporyn júrgizgen túsindirý jumystarynyń nátıjesinde bul kórsetkish eki eseden astam tómendedi. Máselen, 2025 jyldyń sońynda bereshek kólemi 2,13 mlrd teńge bolǵan.
Qazirgi tańda Qyzylorda oblysyndaǵy bereshek kólemi 251,3 mln teńge, Túrkistan oblysynda 341,7 mln teńge, «D. Qonaev atyndaǵy Úlken Almaty kanaly» fılıalynda 211,3 mln teńge, Jambyl oblysynda 94,65 mln teńge, Jetisý oblysynda 44,9 mln teńge, Batys Qazaqstan oblysynda 21,3 mln teńge, al Shyǵys Qazaqstan oblysynda 1,4 mln teńge.
Qazirgi ýaqytta «Qazsýshar» RMK sý tutynýshylarmen jańa bıllıng júıesi arqyly elektrondy formatta kelisimsharttar jasasyp jatyr. Júıede avtomatty shekteý qarastyrylǵan: eger tutynýshynyń 5 myń teńgeden asatyn debıtorlyq bereshegi bolsa, onymen jańa kelisimshart jasalmaıdy.
— Debıtorlyq bereshek sýarý maýsymynyń turaqty ótýine kedergi keltiredi. Sý jetkizý qyzmetinen túsken qarajat gıdrotehnıkalyq nysandardy tazalaýǵa jáne jóndeýge, janar-jaǵarmaı materıaldaryn, sondaı-aq jumysqa qajetti basqa da materıaldardy satyp alýǵa jumsalady. Sondyqtan dıqandardy bereshekterin múmkindiginshe tezirek óteýge shaqyramyz. Bul vegetatsııa kezeńinde sý sharýashylyǵy nysandarynyń turaqty jumysyn qamtamasyz etýge múmkindik beredi, — dedi «Qazsýshar» RMK bas dırektorynyń mindetin atqarýshy Anýar Óskenbaev.
Aıta ketelik Qazaqstanda 102 kásiporyn 408 jumyskerine jalaqy boıynsha bereshek.
