QazSTA rektory para alǵan 7 oqytýshyny jumystan shyǵarmaq
«Nur Otan» partııasynyń «Jas-Otan» jastar qanatynyń ókilderi «Adal sessııa» monıtorıngin qorytyndylady.
Bul monıtorıng boıynsha sybaılas jemqorlyq eń beleń alǵan ýnıversıtetterdiń ishine Qazaq sport jáne týrızm akademııasy kirgen.
Jastardyń taldaýyna qatysty akademııanyń rektory Qaırat Zakırıanov jaýap berdi.
«Bul aqparat biz úshin óte jaǵymsyz tosynsyı boldy. Akademııa sheńberinde shuǵyl jınalys ótkizdik. Bizde 3000 jýyq stýdent kúndizgi bólimde oqıdy. Olardyń arasynda memlekettik grant alǵandar da bar. Memlekettik grant ıegeri bolý ońaı emes. Ádette ulttyq quramaǵa kiretin joǵary sanattaǵy sportshylar kiredi. Olardyń kópshiligi ýaqyttaryn oqý-jattyǵý oryndarynda ótkizedi. Kóp jarysqa qatysatyn bolǵan soń olardyń bilimderi sabaqqa qatysatyn stýdentterge qaraǵanda tómen bolýy ǵajap emes. Kópshiligi sessııany osylaı jabýy da yqtımal. Oqytýshy da ala salýy múmkin. Ekeýin de aqtamaımyn», - dedi rektor.
Onyń aıtýynsha, Akademııada sybaılas jemqorlyq faktorlaryn baqylaıtyn qaýipsizdik qyzmeti jumys istep tur.
«Bizdiń baqylaýymyzda júrgen kafedra meńgerýshileri men oqytýshylar bar. Sońǵy shuǵyl jınalysta men ol kisilerdiń attaryn atadym. Osy 7-8 adammen eńbek kelisimshartyn buzatyn bolamyz. Olardyń ishinde kafedra meńgerýshileri men dekannyń orynbasarlary bar», - dedi Q.Zakırıanov.
