«KAZsport» telearnasyn jerseriktik jáne kabeldik júıede habar taratatyn operatorlar arqyly kórsetiledi
ASTANA. 24 maýsym. QazAqparat - «2013 jyl 1 shilde kúni otandyq telearnalar keńistiginde tuńǵysh ret «KAZsport» sport telearnasy óziniń alǵashqy habaryn taratady», - dep habarlady «Qazaqstan» AQ» respýblıkalyq teleradıo kesheniniń baspasóz hatshysy Tanakóz Tolqynqyzy.
Qazaqstan Respýblıkasynyń Prezıdenti Nursultan Nazarbaev 2012 jyly «Qazaqstannyń áleýmettik jańǵyrtylýy: Jalpyǵa ortaq Eńbek qoǵamyna qaraı 20 qadam» joldaýynda Sport jáne dene shynyqtyrý isteri agenttigi men Mádenıet jáne Aqparat mınıstrligine birlesip mamandandyrylǵan sport arnasyn ashý týraly tapsyrma bergen bolatyn, delingen «Qazaqstan» RTRK» AQ habarlamasynda.
Bul arna «Qazaqstan» RTRK» AQ quramyna enedi. Elimizdiń barlyq aımaqtarynan tikeleı efırde habar taratýǵa múmkindigi bar korporatsııa quramyndaǵy «KAZsport» telearnasyn jerseriktik jáne kabeldik júıede habar taratatyn operatorlar arqyly kórýge bolady.
«KAZsport» sport telearnasynyń shyǵarmashylyq ujymynda óz isiniń bilikti mamandary qyzmet atqarady. Olardyń arasynda Qazaqstannyń eń úzdik sport jýrnalısterine beriletin Seıdahmet Berdiqulov atyndaǵy júldeniń ıegerleri de bar.
Qazaqstandyq jankúıerler Ulttyq qurama komandalar qatysatyn qurlyqtyq jáne álemdik deńgeıdegi jarystardy, el birinshilikterin tikeleı kóre alady. Atap aıtsaq, velosporttan Týr de Frans pen Výelta kópkúndikteri, sý sporty túrleri, jeńil atletıka, dzıýdo, kórkem gımnastıka, karate shıto-rıý, grek-rım jáne erkin kúres, aýyr atletıka men shańǵy sportynan Álem chempıonatyn, voleıboldan áıelder arasynda Álemdik gran-prı kezeńdik oıyndaryn, Nemis býndeslıgasyn, Qazan qalasynda ótetetin jazǵy Ýnıversıada oıyndaryn, tenısten Wimbledon týrnırin, voleıbol, aýyr atletıka men velosporttan Azııa birinshilikterinen translıatsııa uıymdastyrylady.
Táýligine 20 saǵat habar taratatyn arnanyń baǵdarlama kestesinen Fýtboldan Qazaqstan premer-lıgasy men Ulttyq qurama kezdesýleri, sport túrlerinen el chempıonattary men kýbogy oıyndaryn da tabýǵa bolady.
