«Kazsport» telearnasy kastıng jarııalady
ASTANA. QazAqparat - «Kazsport» telearnasy sporttyq sharalardyń kommentatorlaryn jumysqa qabyldaıdy. Kastıngke sport túrlerinen jaqsy habardar jáne olardy halyqqa erkin jetkize alatyn 18 jastan asqan azamattar qatysa alady, dep habarlaıdy QazAqparat.
Kastıngtiń maqsaty - sporttyń bir nemese birneshe túrin jetik meńgergen kommentatorlar qataryn jańa esimdermen tolyqtyrý. «Telearnaǵa velosport, boks, basketbol, voleıbol, hokkeı, erejesiz jekpe-jek (MMA), kúres jáne ulttyq sport jarystaryn teleefırde memlekettik jáne orys tilderinde júrgize alatyn qyz-jigitter qajet. Mánerlep syrǵanaý, kórkem gımnastıka jáne júzýden ótetin sharalardy júrgizýge qyz-kelinshekter arasynan kommentatorlar irikteledi. Sonymen qatar, telearnaǵa jan-jaqty, ıaǵnı birneshe sport túriniń qyr-syryn meńgergen kommentarlar kerek», - delingen baspasóz baıanynda.
Aıta keterligiń, kastıng barysynda ár úmitkerge ózin 5 sport túrinen baıqap kórýge múmkindik beriledi. Olar fýtboldaǵy Qazaqstan chempıonatynan, basketboldaǵy «Astana» BK VTB Lıgasynan, bokstaǵy G. Golovkın, Q. Islam, D. Eleýsinovterdiń kezdesýlerinen, voleıboldaǵy Kazaqstan chempıonatynan, velosporttaǵy Týr de Franstan, aralas jekpe-jektegi (MMA), hokkeıdegi «Barys» QHL, mánerlep syrǵanaýdaǵy D. Ten men E. Tursynbaevanyń ónerinen, kórkem gımnastıkadaǵy S. Áshirbaevanyń sheberliginen, ulttyq sport túrlerindegi - kókpar, aýdaryspaq, qazaqsha kúres boıynsha tapsyrmalar oryndaıdy.
«Kazsport» telearnasynyń kommentatory» ataný úshin úmitker sheberligin baıqatatyn 3 mınýttan aspaıtyn aýdıojazba daıyndap, kommentarıı jasaý barysynda qandaı aqparat quralyn paıdalanǵanyn kórsetip jáne ózi týraly qysqasha málimetti tirkep, kazsport.kz@mail.ru jiberýi shart. Ótinimder 2016 jyldyń 17 qarashasyna deıin qabyldanady. Alǵashqy irikteýden ótken úmitkerlerge kastıngke shaqyrtý joldanady. Kastıng 2016 jyldyń 19-20 qarasha kúnderi «Qazaqstan» RTRK AQ «Kazsport» telearnasynyń ǵımaratynda ótedi.
