«Kazsport» telearnasy ІІ qysqy Olımpıada oıyndarynyń ashylý saltanatyn kórsetedi
ASTANA. QazAqparat - «Kazsport» telearnasy ІІ qysqy Olımpıada oıyndarynyń ashylý saltanatyn tikeleı efırde kórsetedi, dep jazylǵan telearnanyń saıtynda.
«Norvegııanyń Lıllehammer qalasynda 12-21 aqpan aralyǵynda jasóspirimder arasyndaǵy II qysqy Olımpıada oıyndary ótedi. Oıyndarǵa 16 sport túrinen 70 medal sarapqa salynady. Sondaı-aq, dúnıejúziniń 70 memleketinen keletin 1100-ge jýyq 15 pen 18 jas aralyǵyndaǵy jas sportshylar qatysady», delingen jazbada.
Qysqy Olımpıadaǵa Qazaqstan atynan sporttyń 9 túrinen synǵa túsetin 18 sportshy baq synaıdy.
Olar: bıatlon (Arına Pantova, Evgenııa Krasıkova, Ivan Darın, Berik Janbolatov), konkımen júgirý (Anvar Mýhamadeev, Marııa Gromova), mánerlep syrǵanaý (Elızabet Tursynbaeva), short-trek (Erkebulan Shamýhanov, Anıta Nagaı), taý shańǵy sporty (Ekaterına Karpova), shańǵy sporty (Ivan Lıýft, Anjelıka Tarasova), tuǵyrdan shańǵymen sekirý (Sergeı Tkachenko), frıstaıl (skı-kross) (Oljas Qaırat, Aıjan Sapııanova) jáne shana sporty (Roman Efremov, Denıs Tatıanınchenko, Anastasııa Bogacheva) túrleriniń ókilderi.
Memlekettik tý kóterýshi bolyp short-trek sportshysy Erkebulan Shamýhanov saılandy. Ol Avstrııa elinde halyqaralyq konkıshiler odaǵy (ISU) uıymdastyrǵan «Danabia 1 - Austrian Open& Styrian Open 2015» jarysynyń júldegeri, Qazaqstan birinshiliginiń birneshe dúrkin jeńimpazy.
Eske sala keteıik, 2012 jyly Avstrııanyń Insbrýk qalasynda ótken jasóspirimder arasyndaǵy I Qysqy Olımpıada oıyndarynda bizdiń sportshylarymyz 10 sport túrinen qatysyp, úsh medalǵa (1 kúmis, 2 qola) qol jetkizip, jalpy esepte 23-shi orynǵa ıe bolǵan edi.
Aıta keteıik, «Kazsport» telearnasy ІІ qysqy Olımpıada oıyndarynnyń ashylý saltanatyn juma, 12 aqpanda, saǵat 00:00-de tikeleı efırde kórsetedi. Sonymen qatar, kúndelikti túrde sholý júrgizedi.
