«Qazsport» telearnasy bokstan Azııalyq irikteý jarysyn tikeleı efırde kórsetedi
ASTANA. QazAqparat - Qazir qazaqstandyq sportsúıer qaýymnyń nazary Qytaıdyń Tsıanan qalasynda bokstan ótip jatqan Azııalyq irikteý jarysyna aýyp turǵany jasyryn emes.
Búgin shırek fınaldyq kezdesýler ótýde. Astana ýaqytymen 12-00-de bastalǵan túske deıingi básekelerde óner kórsetken Abylaıhan Júsipov, Ádilbek Nııazymbetov, Ivan Dychko jeńisti joldaryn jalǵastyrdy. Qyzdar arasynda synǵa túsip jatqan Darıǵa Shákimova qarsylasyn jeńip, jartylaı fınalǵa joldama aldy. Al Nazym Ishanova qytaılyq boksshyǵa ese jiberip aldy.
Al keshki saǵat 17-00-de ózge salmaqtaǵy boksshylar sharshy alaǵa shyqty. Búgin Oljas Sáttibaev, Qaırat Erálıev jáne Jánibek Álimhanuly jartylaı fınalǵa shyǵý úshin bar kúshterin salatyn bolady.
El turǵyndary úshin Qytaıdyń Tsıanan qalasynda ótip jatqan jarystyń barysyn tamashalaý múmkin bolmaı tur. Degenmen qazaqstandyq jankúıerlerge «Qazsport» telearnasy úlken syılyq jasap otyr. Bokstan ótip jatqan mańyzdy lıtsenzııalyq básekeni el turǵyndary tikeleı efırde kórý múmkindigine ıe bolmaq.
«Qazsport» telearnasy 31 naýryz, beısenbi kúninen bastap Azııalyq irikteý jarysyn tikeleı efırde kórsetedi dep kútilýde. Astana ýaqytymen saǵat 12-00-de «Qazsport» telearnasy alǵashqy kórsetilimin bastaıdy. Atap aıtqanda, jartylaı fınaldyq tartysty básekede -46, -49, -56, -64, -75 kılo salmaqtaǵy erler, (-48, -51, -57, -60, -69, -75 kılo) salmaqtaǵy qyzdar sharshy alańǵa shyǵady.
Al sol kúni 16-00-de -52, -60, -69, -81, -91, +91 kılo salmaqtaǵy erler baq synaıdy.
Qazsport» telearnasynyń baǵdarlamasyna sáıkes, 1-2 sáýir kúnderi de (saǵat 12-00 jáne 16-00) jartylaı fınaldyq jáne fınaldyq básekeler ótedi dep josparlanǵan.
