«KAZsport» telearnasy 1 shildede iske qosylady - Muhtar Qul-Muhammed

Osydan týra 1 jyl buryn, ótken jyldyń shilde aıynda Elbasy arnaıy sport telearnasyn ashý jóninde tapsyrma bergenin atap ótken ol: «Sodan beri birqatar jumystar atqaryldy. Atap aıtqanda, respýblıkalyq bıýdjetten tıisti qarajat qarastyryldy. Qazmedıadan oryn bólindi. Qajetti qural-jabdyqtar alyndy. Halyqaralyq tájirıbe tereń zertteldi. Onyń ishinde Eýrosport, Skaısport, NTV+, taǵy basqa telearnalardyń jumysy qarastyryldy. Ataýy, kontenti bekitildi. Telearnanyń aty «Qazsport» dep bekitilip otyr. Jyldyq jospar jasaldy», - dedi.

Mınıstrdiń aıtýynsha, atqarylǵan jumys túgeldeı Prezıdent Ákimshiligimen jáne Memlekettik hatshymen kelisilgen. Qazsport telearnasyn ashýǵa daıyndyq barysy Elbasyna baıandalǵan. Qazsport "Otaý tv" teletaratý júıesimen, kabeldi operatorlarmen jáne ınternet arqyly da taratylatyn bolady.

«Shamamen respýblıkanyń 65 paıyz aýdıtorııasyn qamtıdy dep kútip otyrmyz. Arna eki tilde jumys isteıtin bolady. Mazmun jaǵyna keletin bolsaq, Qazaqstanda ótetin sport jarystarynyń barlyǵynan tikeleı translıatsııa uıymdastyrylatyn bolady. Shetelderde ótetin sport jarystarynan tikeleı habarlar júrgiziledi. Kúndelikti jańalyqtar birneshe ret shyǵyp otyrady. Sport týraly derekti fılmder de kórsetilmek. Bolashaqta qysqametrajdy kórkem fılmderdi de túsirý josparlanyp otyr», - dedi M.Qul-Muhammed.

Onyń atap ótýinshe, telearna kún saıyn tańerteńgi saǵat 10-nan túngi 12-ge deıin 14 saǵat mólsherinde habar taratatyn bolady. Maqsat - sportty jáne salaýatty ómirdi nasıhattaý, buqaralyq sportty qoldaý, elimizdiń sport jetistikterin nasıhattaý, halyqtyń sport salasyndaǵy bilimin kóterý, kórermenderge der kezinde naqty aqparattar berý.

«Bir sózben aıtqanda, arnany ashýǵa daıyndyq jumysy túgeldeı bar jáne ony biz aldaǵy ýaqytta, dálirek aıtar bolsaq, 1 shilde kúni ashýǵa daıynbyz», - dedi mınıstr.