«KAZsport» memlekettik tuńǵysh sport telearnasy ashyldy

ASTANA. 1 shilde. QazAqparat - Búgin, 1 shildede «Qazmedıa ortalyǵynda» «KAZsport» memlekettik tuńǵysh sport telearnasynyń ashylý rásimi ótti.

Saltanatty sharaǵa belgili qazaqstandyq sportshylar, Azııa jáne Olımpıada oıyndarynyń chempıondary, halyqaralyq jáne respýblıkalyq sport jarystarynyń jeńimpazdary, sport jattyqtyrýshylary men ardagerleri qatysty.

QR Mádenıet jáne aqparat mınıstri Muhtar Qul-Muhammed pen QR Sport jáne dene shynyqtyrý isteri agenttiginiń tóraǵasy Erlan Qojaǵapanov jańa sport telearnasynyń ashylý saltanatyna oraı sóz sóıledi. Halyqaralyq Olımpıada komıtetiniń prezıdenti Jak Rogge de quttyqtaý joldady. Sonymen qatar, 1980 jyly Máskeýde ótken Olımpıada oıyndarynyń chempıony Jaqsylyq Úshkempirov, 2000 jyly Sıdneıde ótken Olımpıada chempıony Olga Shıshıgına, 2 márte Olımpıada oıyndarynyń chempıony Ilıa Ilın, shahmattan 4 márte álem chempıony Bıbisara Asaýbaeva jáne t.b. «KAZsport» telearnasynyń ashylýymen quttyqtady.

Jańa sport arnasy «Mádenıet», «Balapan» jáne 14 aımaqtyq telearnalar toptasqan «Qazaqstan» RTRK» AQ quramyna enedi. «KAZsport» telearnasyn «OTAU TV» ulttyq jerseriktik teleradıohabar tartaý jelisi men kabeldik júıede habar taratatyn operatorlar arqyly kórýge bolady.

«KAZsport» telearnasynda taralatyn jalpy habarlardyń 70%-y tikeleı jáne túpnusqa translıatsııalardan turady. Olardyń negizgisi - Qazaqstanda keń etek jaıǵan sport túrlerinen ótetin ishki chempıonattar men halyqaralyq bedeldi básekeler. Sport sharalary týraly telekórsetilimderdi belgili qazaqstandyq sport jýrnalısteri qazaq jáne orys tilderinde kommentarıı men saraptama jasaı otyryp júrgizedi. Baǵdarlamalar kestesine telekórsetilimder, jańalyqtar, tól baǵdarlamalar men sporttyq derekti kıno enedi.