Kazsport arnasy tórt jańa kommentatordy jumysqa aldy
ASTANA. QazAqparat - Kastıngke qatysýǵa nıet bildirgen adamdardyń ishinen 83-i irikteldi. Sodan tek on adam ǵana ekinshi kezeńge joldama aldy. Osy synaqtan bes adam súrinbeı ótti. Alaıda jumysqa tórt kommentator qabyldandy, dep xabarlaıdy QazAqparat tilshisi «Qazaqstan» RTRK» AQ baspasóz qyzmetine silteme jasap.
"Ekinshi kezeńnen súrinbeı ótken bes adam Kórkemdik keńestiń qaraýyna jiberilgen bolatyn. Úmitkerlerdiń daýysy jazylǵan materıaldarmen tanysqan Keńes músheleri bes adamnyń arasynan tórteýin kommentatorlyq jumysqa alý týraly sheshim qabyldady" - delingen resmı xabarlamada.
Osylaısha, «Kazsport» telearnasynyń kommentatorlyǵyna Darhan Júsipov (Astana qalasynyń turǵyny, hokkeı jáne basqa da komandalyq sport túrleriniń kommentatory), Dıdar Qadyrov (Aqmola oblysynyń turǵyny, fýtbol jáne basqa da komandalyq sport túrleriniń kommentatory), Maksım Shımanskıı (Astana qalasynyń turǵyny, fýtbol jáne basqa da komandalyq sport túrleriniń kommentatory) jáne Ersin Erik (Astana qalasynyń turǵyny, fýtbol kommentatory) qabyldandy.
«Qazaqstan» RTRK» AQ óz kezeginde Astana qalasyndaǵy kastıngke qatysqan barlyq úmitkerge alǵysyn bildirdi jáne osy jolǵy irikteýden ótpeı qalǵandardyń aldaǵy ýaqytta ótetin kezekti kastıngte úzdik shyǵatyndaryna senim tanytty. "Astana qalasyndaǵy kelesi kastıng 2017 jyldyń aqpan aıyna josparlanýda. Al 2016 jyldyń sońǵy kastıngi jeltoqsan aıynyń ortasynda Almaty qalasynda ótedi. Іrikteý týraly tolyq aqparat jeltoqsan aıynyń basynda jarııalanady", - deıdi uıymdastyrýshylar.
Aıta keteıik, sport kommentatory bolǵysy kelgenderdiń arasynda mektep oqýshylary da bolǵan.
