«Kazsport» arnasy bastapqyda el aýmaǵynyń 65 paıyzyn qamtıdy
ASTANA. 1 shilde. QazAqparat - Memleket basshysynyń tapsyrmasyn oryndaý maqsatynda Astananyń 15 jyldyǵyn merekeleý qarsańynda «Qazmedıa ortalyǵy» ǵımaratynda búgin jańa «Kazsport» sport telearnasy ashyldy.
«Kazsport» qyzmeti salaýatty ómir saltyn nasıhattap, buqaralyq sportpen aınalysý mádenıetin damytýǵa jáne ulttyq sport túrlerin alǵa jyljytýǵa baǵyttalǵan.
Sport arnasyn qurý kezinde aldyńǵy qatarly sheteldik jáne halyqaralyq arnalardyń (Eýrosport, Sky sport, ESPN, NTV Plıýs sport jáne basqa da) tájirıbesi eskerildi. Bul baǵdarlamalyq saıaıasatty qalyptastyrýda, habar taratý kestesin daıyndaýda jáne redaktsııalyq jobalardy irikteýde kórinis tapty.
Atap aıtqanda, táýlik saıyn 14-saǵattyq habar taratý júzege asyrylady (tańerteńgi saǵat 10.00-den saǵat 00.00-ge deıin). Álemdik deńgeıdegi iri sport is-sharalaryn «tikeleı efırde» kórsetý úshin translıatsııa uzartylýy múmkin. Translıatsııalar kestesi mańyzdy halyqaralyq jarystardy qamtıdy, olarǵa qazaqstandyq sportshylardyń qatysýyna jáne ulttyq chempıonattardyń kórsetilimine erekshe nazar aýdarylady. Sport jańalyqtarynyń, baǵdarlamalardyń, áıgili qazaq sportshylary, olımpıada chempıondary jáne mańyzdy sport is-sharalary týraly derekti fılmderdiń udaıy shyǵyp turýy qarastyrylǵan.
«Kazsport» arnasynyń habar taratý kestesine «tikeleı efır» formatynda ústimizdegi jyldyń shilde aıynda «Týr de Frans» velojarysy, Reseıdegi Jazǵy Ýnıversıada (Qazan qalasy), bokstan Azııa chempıonaty, Ispanııadaǵy sý sporty túrlerinen álem birinshiligi jáne Ýımbldon tennıs týrnıri enip úlgerdi.
Fýtboldan nemis býndeslıgasy men Reseı premer-lıgasy, WTA nusqasy boıynsha tennıs (áıelder tennısi), bıatlon, shańǵy jarystary boıynsha álem kýbogy, voleıboldan álemdik gran-prı serııasy, mánerlep syrǵanaý, dzıýdo, t.b. translıatsııalaý quqyǵy boıynsha kelisimsharttar jasaldy.
«Eýrosport», «NTV-Plıýs» (Reseı), «Idman» (Ázirbaıjan), «Sport Ýkraına» (Ýkraına) arnalarymen yntymaqtastyq qarym-qatynas ornatyldy. Turaqty sheteldik keńesshilerdi tartýǵa baılanysty suraqtar sheshilýde.
Tarmaqtalǵan aımaqtyq ınfraqurylymdy eskere otyryp, sport arnasy «Qazaqstan» RTRK» AQ bazasynda ashylyp otyr. Bul aımaqtardaǵy sporttyq sharalardyń sapaly berilýin qamtamasyz etedi.
«Kazsport» arnasy zamanaýı HD-formatta «Qazmedıa ortalyǵynan» taratylady. Shtat quramy - 43 qyzmetker.
Teletaratylym «Otaý TV» ulttyq sandyq jerseriktik jelisi arqyly jáne «Alma TV», «ID TV», «Digital TV», «ICON TV» jáne t.b. iri kabeldi operatorlar arqyly júzege asyrylady. Bastapqyda el aýmaǵynyń 65 paıyzyn qamtý kózdeledi. «KazSport» arnasynyń ashylýy Qazaqstandaǵy jáne halyqaralyq deńgeıdegi iri sport oqıǵalaryn translıatsııalaýdy uıymdastyrýdaǵy negizgi host-habar taratýshy retinde jumys isteýdiń tájirıbelik daǵdylaryn qalyptastyrýǵa múmkindik beredi. Bul máseleniń ushy Azıadany ótkizgende shyqty, demek 2017 jyly Almatyda ótkiziletin Ýnıversıada kezinde de taǵy aldymyzdan shyǵary haq.
Sheteldik sport arnalarynyń joǵary reıtıngterine qarap, oǵan qosa, barlyq tehnıkalyq jáne uıymdastyrý máseleleriniń jan-jaqty qamtylýyn esepke alsa, «Kazsport» arnasynyń kórermendik aýdıtorııasynan úlken qyzyǵýshylyq bolady dep kútilýde.
