«Qazseldenqorǵaýdyń» burynǵy basshysy Kárim Kókirekbaev 12 jylǵa sottaldy

QONAEV. KAZINFORM — Almaty oblysynyń qylmystyq ister jónindegi mamandandyrylǵan aýdanaralyq sotynda alqabılerdiń qatysýymen Kárim Kókirekbaev, onyń orynbasary Ádilet Ahataev pen merdiger Andreı Poplavskııge qatysty qylmystyq is qaraldy. 

Sot anyqtaǵandaı, Kárim Kókirekbaev pen Ádilet Ahataev laýazymdy tulǵalar bola otyryp, TOO dırektory Andreı Poplavskıımen sóz baılasyp, oryndalǵan jumys aktilerine kedergisiz qol qoıý úshin odan asa iri mólsherde para alǵan.

Sondaı-aq, Andreı Poplavskıı shyn máninde oryndalmaǵan qurylys-montaj jumystarynyń aktilerine qol qoıýdy uıymdastyrǵan. Osy áreketterdiń saldarynan memlekettik mekemege 1 987 827 622,63 teńge kóleminde zalal keltirilgen.

Alqabılerdiń úkimimen Kárim Kókirekbaev men Ádilet Ahataev Qylmystyq kodekstiń 366-babynyń 4-bóligi boıynsha, al Andreı Poplavskıı — 195-babynyń 4-bóliginiń 2) tarmaǵy jáne 367-babynyń 4-bóligi boıynsha kináli dep tanyldy.

— Sot úkimimen Kárim Kókirekbaevqa 12 jylǵa, Ádilet Ahataev pen Andreı Poplavskııǵa 11 jylǵa bas bostandyǵynan aıyrý jazasy taǵaıyndaldy. Sottalǵandar ómir boıyna memlekettik qyzmette laýazymdy qyzmet atqarý quqyǵynan aıyryldy, — dep habarlady Almaty oblysynyń qylmystyq ister jónindegi mamandandyrylǵan aýdanaralyq sotynyń baspasóz qyzmeti.

Úkim zańdy kúshine engen joq.

Eske salaıyq, byltyr «Qazseldenqorǵaýdyń» burynǵy basshysy Kárim Kókirekbaev sot zalynda qamaýǵa alynǵan bolatyn. 

Oǵan deıin para aldy dep aıyptalǵan ol aqtalǵan edi.