«Qazseldenqorǵaý» ShQO fılıalynyń basshysy jumysqa adamdy tirkep, jalaqyny ózi alyp kelgen

ÓSKEMEN. KAZINFORM – «Qazseldenqorǵaý» mekemesi Shyǵys Qazaqstan oblystyq fılıalynyń dırektory sottaldy. 

Osyǵan qatysty sot isi Óskemen qalalyq №2 sotynda qaraldy. Tótenshe jaǵdaılar mınıstrligine qarasty «Qazseldenqorǵaý» memlekettik mekemesi ShQO fılıalynyń basshysy bolǵan sottalýshyǵa QK-niń 190-baby 3-bóligi 2-tarmaǵy boıynsha (Qyzmettik babyn paıdalana otyryp jasalǵan alaıaqtyq) aıyp taǵyldy.

- Ol T. esimdi azamatty jumysqa fılıal baqylaýshysy laýazymyna alǵan. Alaıda er adam eshqandaı jumys istemegen. Al onyń aı saıynǵy jalaqysyn fılıal basshysy alyp otyrdy. Osynyń saldarynan memleketke keltirilgen shyǵyn zeınetaqy jarnalaryn esepke alǵanda 2 734 881 teńge boldy, - dep habarlady sottyń baspasóz qyzmetinen.

Sot barysynda aıyptalýshy óz kinásin tolyq moıyndap, istegen isine ókinetindigin aıtyp, memleketke keltirilgen zalaldy tolyqtaı ótedi.

Sot sheshimimen «Qazseldenqorǵaý» mekemesi ShQO fılıalynyń eks-basshysy 3 jylǵa bas bostandyǵynan aıyryldy. Sondaı-aq ol memlekettik qyzmette jumys isteý quqyǵyn ómir boıyna joǵaltty.

Eske salsaq, osyǵan deıin úleskerlerden zańsyz 5,5 mlrd teńgeden astam qarajat tartqan kompanııa basshylary sottalǵany habarlanǵan.