«Qazseldenqorǵaý» mekemesi Almatydaǵy laı kóshkininiń basty sebebin atady

ALMATY. KAZINFORM – «Qazseldenqorǵaý» memlekettik mekeme mamandary Almatydaǵy kóshkinniń basty sebebin anyqtady.

«8 aqpan túngi saǵat 02:20-da taý baýraıynyń orta bóligine tartylǵan sýyq sý qubyrynyń jarylýy saldarynan topyraq ylǵaldanǵan. Keıin Almaty qalasy, Medeý aýdanyndaǵy Olımpııskaıa kóshesinde ornalasqan «Taý-Samaly» yqshamaýdanyndaǵy №3A jáne №3 jeke turǵyn úılerdi laı kóshkini basyp qaldy», - dep habarlady «Qazseldenqorǵaý» MM baspasóz qyzmetinen.

Memlekettik mekeme mamandarynyń málimetinshe, túsken jyljymanyń kólemi - 3 200 tekshe metr. Bul aımaqtaǵy eńistiń tiktigi shamamen - 45-50 gradýs.

Esterińizge sala keteıik, 8 aqpanda Medeý aýdanynyń «Taý Samaly» shaǵyn aýdanyndaǵy Olımpıskıı kóshesi boıynda tehnogendik sıpattaǵy topyraqtyń laılanýy saldarynan laı kóshkini boldy.

Keıin Almaty qalasy Tótenshe jaǵdaılar departamenti men Respýblıkalyq jedel-qutqarý jasaǵynyń kúshteri úıindi astynan tórt adamnyń denesin tapty. Olardyń barlyǵy bir otbasynyń múshesi - 1984 jyly týǵan er adam, 1980 jyly týǵan áıel jáne 2007 jylǵy egiz jasóspirim ul balalar. 

Tótenshe jaǵdaılar mınıstrliginiń psıhologtary marqumdardyń týystary men kórshilerine jedel psıhologııalyq kómek kórsetip jatyr.