Qazseldenqorǵaý mekemesi Aqsaı bógetine qatysty túsinik berdi
ALMATY. KAZINFORM — «Qazseldenqorǵaý» mekemesi Aqsaı bógetine qatysty túsinikteme berdi.
Mekeme basshysy Arman Ahmetovtyń aıtýynsha, Aqsaı ózeni Almaty qalasyndaǵy sel qaýpi bar ózenderdiń birine jatady. Onyń joǵarǵy aǵysynda 25 muzdyq pen 20 moreno-muzdyq kóli ornalasqan.
«Aqsaı seldi ustaý bógetiniń qurylysy mańyzdy. Onyń maqsaty sel aımaǵynda ornalasqan halyqtyń ómiri men sharýashylyq nysandaryn qorǵaý. Sel qaýpi aımaǵynda 30 myńnan astam adam bar. Qazirgi ýaqytta merdiger óz mindettemelerin oryndamaǵandyqtan nysannyń qurylysy toqtatylyp, tıisti kelisimshart buzyldy», — dedi ol.
Onyń aıtýynsha, qazir morenalyq kólder qysqy rejımde, bógettiń jarylý qaýpi joq.
Buǵan deıin Qarjylyq monıtorıng agenttigi Almatyny selden qorǵaý úshin Aqsaı ózeniniń basseınine bóget salýǵa mindettelgen merdiger kompanııa memleketke 775 mln teńge zalal keltirgenin habarlaǵan bolatyn.
Keıin Tótenshe jaǵdaılar mınıstrligi «Aqsaı» basseınindegi seldi ustaıtyn bógetti salǵan merdigerge qylmystyq is qozǵalǵanyn málimdedi.
