Kazsat pen Oneweb spýtnıkteri Starlink-ti almastyrýy múmkin
ASTANA. KAZINFORM – Tsıfrlyq damý, ınnovatsııalar jáne aeroǵarysh ónerkásibi mınıstrligi Ilon Mask ınternet-spýtnıgine shekteýler sebebin túsindirip, vedomstvo qandaı balama usynyp otyrǵanyn atady.
Ótken jyldyń sońynda Tsıfrlyq damý mınıstrligi Thuraya, Iridium, Inmarsat jáne Starlink spýtnıktik baılanys júıesin jetkizýge jáne paıdalanýǵa tyıym salý kózdelgen buıryq jobasyn jarııa etken bolatyn.
Osyǵan oraı agenttik joldaǵan resmı saýalǵa jaýap bergen vedomstvo qabyldanǵan shara ulttyq qaýipsizdikke tónetin qatermen baılanysty ekendigin alǵa tartady. Óıtkeni, Qazaqstan zańyna sáıkes, shetelden basqaralatyn baılanys jelisin paıdalanýǵa tyıym salynǵan. Atalǵan buıryq jobasy búginde qosymsha talqylanyp jatyr.
Starlink ornyn kim basady ?
Elimiz sheteldik spýtnık júıesi shekteletindigine baılanysty balama nusqalar qarastyryp jatyr.
- Shalǵaı aýdandardy baılanyspen qamtamasyz etý máselesin sheshý úshin balama nusqa retinde otandyq «KazSat» spýtnık jelisi men Qazaqstan aýmaǵynda baılanysty basqarý ortalyǵyn salǵan OneWeb halyqaralyq kompanııasy qarastyrylyp jatyr. Іlki jobaa aıasynda aýyl mektepterine Internet usyný úshin Starlink tehnologııasyn qoldaný uıymdastyryldy, - dedi Tsıfrlyq damý mınıstrligine qarasty Telekommýnıkatsııa komıtetinen.
Munan bólek, mınıstrlik ǵaryshtyq tehnologııa jáne spýtnıktik baılanys salasyndaǵy yntymaqtastyq úshin Amazon Kuiper Commercial Services LLC kompanııasymen memorandýmǵa qol qoıdy. Qytaılyq Shanghai Spacecom Satellite Technology Co., Ltd kompanııasymen Qazaqstaan aýmaǵynda basqarý ortalyǵyn salý boıynsha kelissóz júrgizilip jatyr.
- Qazaqstan Respýblıkasynyń Úkimeti «Qoljetimdi Internet» ulttyq jobasyn bekitkenin qosymsha atap ótemiz. Onyń aıasynda halyqty Internetke qoljetimdilikpen qamtamasyz etý úshin qajetti ınfraqurylym salý josparlanǵan, - dedi vedomstvodan.
Buǵan deıin eki myńǵa jýyq mektep Starlink ınternetine qosylǵanyn jazǵan edik.