Kazsat qyzmetin 15 baılanys jáne habar taratý operatorlary paıdalanady

AQKÓL. QazAqparat – Búgin, 2021 jyldyń 28 sáýirinde Kazsat-3 qazaqstandyq baılanys jáne habar taratý spýtnıginiń ushyrylǵanyna 7 jyl toldy, dep habarlaıdy QazAqparat tilshisi.

Kazsat-3 ǵaryshtyq apparatyn jáne «Lých-5V» retranslıator spýtnıgin orbıtaǵa shyǵarǵan «Proton-M» tasymaldaýshy zymyrany «Brız-M» údemeli blogymen 2014 jyldyń 28 sáýirinde Baıqońyr ǵarysh aılaǵynyń №81 alańynan ushyryldy.

Úshinshi qazaqstandyq baılanys jáne habar taratý spýtnıgi «Respýblıkalyq ǵaryshtyq baılanys ortalyǵy» AQ, «M.F. Reshetneva atyndaǵy «Aqparattyq spýtnıktik júıe» AAQ, Thales Alenia Space-pen (Italııa) tapsyrysymen daıyndalǵan.

Kazsat-3-tiń óziniń orbıtalyq jaıǵasymy bar – shyǵystyq uzyqtyqtyń 58,5 gradýsy, spýtnıktiń jumys resýrsy 15 jylǵa jaramdy.

Mamandardyń aıtýynsha, qazaqstandyq baılanys jáne habar taratý spýtnıgin qurýda ǵaryshtyq apparattyń aldyn ala belgilengen sıpattamasy men senimdiliktiń kerekti deńgeıin qamtamasyz etýge múmkindik beretin zamanaýı tehnıkalyq sheshimder paıdalanyldy. «Spýtnıktiń obrıtadaǵy 7 jylynda onyń maqsatty mindetine áser etetin birde-bir oqys jaǵdaı tirkelmedi. Búgingi kúni Kazsat-3 78%-ǵa júktelgen, jáne onyń qyzmetterine degen suranys artýda», - dedi «Aqkól» ǴBO dırektory Qaırat Telǵarın.

Kazsat-3-tiń teleradıo habarlaryn taratý, telefonııa, derekterdi jetkizýge arnalǵan qyzmet kórsetý aımaǵy Qazaqstan Respýblıkasynyń barlyq aýmaǵyn, Reseıdiń ortalyq bóligin, Ortalyq Azııa elderin qosady.

Búginde qazaqstandyq ǵaryshtyq baılanys júıesi 100% eldiń ishki naryǵyndaǵy qajettilikterdi ótep otyr. Kazsat baılanys spýtnıginiń qyzmetterin el aýmaǵynda ornalasqan 13 myńnan astam spýtnıktik baılanystyń jer stansalary bar 15 negizgi qazaqstandyq baılanys jáne habar taratý operatorlary paıdalanady.