«KazSat-3R» ǵaryshtyq baılanys júıesin qurýǵa konkýrs jarııalandy
ASTANA. KAZINFORM — «KazSat-3R» jańa qazaqstandyq baılanys jerserigin jasaý konkýrsyna qatysýǵa shaqyrýǵa ǵarysh tehnıkasyn óndirýshi 14 kompanııa jaýap berdi, onyń ishinde: 2 qazaqstandyq jáne 12 sheteldik kompanııa.
«Kazsat» ulttyq geostatsıonarlyq ǵaryshtyq baılanys júıesin damytý josparlaryna sáıkes, 2029 jyly «KazSat-3» baılanys jáne habar taratý jerserigin josparly aýystyrý júzege asyrylady, onyń eseptik paıdalaný merzimi 2029 jyldyń sońyna deıin aıqyndalǵan.
«Respýblıkalyq ǵaryshtyq baılanys ortalyǵy» AQ «KazSat-3» jerserigin almastyrý úshin ǵaryshtyq baılanys júıesin qurý jáne paıdalanýǵa berý» jobasy boıynsha jumystardy oryndaý úshin áleýetti jetkizýshini ishki irikteý rásimine kiristi («KazSat-3R» ǵaryshtyq baılanys júıesi)
«KazSat-3R» jobasynyń maqsaty — Qazaqstan Respýblıkasynyń aeroǵarysh salasyn jáne baılanys salasyn damytý, aqparattyq-kommýnıkatsııalyq ınfraqurylymnyń qoljetimdiligin jáne Internetke keń jolaqty qoljetimdiliktiń enýin arttyrý, «KazSat» ulttyq ǵaryshtyq baılanys júıesiniń jumys isteýin qamtamasyz etý.
— «KazSat-3R» jobasyn iske asyrý sheńberinde JITsDM Aeroǵarysh komıteti «KazSat-3R» jobasy boıynsha jumysty oryndaý úshin áleýetti jetkizýshini ishki irikteý rásimderine qatysý úshin 40-tan astam kompanııalardyń — ǵarysh tehnıkasyn óndirýshi kompanııalardyń, onyń ishinde ártúrli maqsattaǵy ǵarysh apparattaryn jasaý salasyndaǵy álemdik tájirıbesi bar kompanııalardyń, sondaı-aq, ǵarysh tehnıkasyn jasaý salasynda alǵashqy qadamdardy jasaǵan startap-kompanııalardyń atyna shaqyrý joldady.
«KazSat-3R» jańa qazaqstandyq baılanys jerserigin jasaý konkýrsyna qatysýǵa shaqyrýǵa ǵarysh tehnıkasyn óndirýshi 14 kompanııa jaýap berdi, onyń ishinde: 2 qazaqstandyq jáne 12 sheteldik kompanııa.
2025 jylǵy 15 jeltoqsanda «RǴBO» AQ áleýetti jetkizýshilerdiń túpkilikti tizimine engen 14 kompanııanyń mekenjaıyna ishki irikteý rásimderine qatysý úshin shaqyrý-habarlama jiberdi, — delingen mınıstrlik habarlamasynda
Áleýetti jetkizýshilerdiń ótinimdi jáne barlyq qajetti qujatty usynýynyń aıaqtalý merzimi 2026 jyldyń naýryz aıynyń sońyna deıin belgilengen.
— «KazSat-3R» jobasyn qarjylandyrý eki qarjylandyrý kózin tartý arqyly josparlanyp otyr. Negizgi qarjylandyrý, bul «KazSat-3R» ǵaryshtyq baılanys júıesiniń jalpy qunynyń 50%-dan astamy «Respýblıkalyq ǵaryshtyq baılanys ortalyǵy» aktsıonerlik qoǵamynyń («KazSat» ǵaryshtyq baılanys júıesiniń operatory) menshikti qarajaty esebinen júzege asyrylatyn bolady, joǵary tehnologııalyq ǵarysh jobasyn qosymsha qarjylandyrý respýblıkalyq bıýdjet qarajaty esebinen júzege asyrylatyn bolady, — delingen habarlamada.
Aıta ketelik «KazSat-3R» jobasyn qoldaýǵa 40 mlrd teńge qajet ekeni týraly jazǵan edik.